Ezbeharra Laredon
Barraka bat itxi dute adingabe bat airean atera ostean
Erredakzioa
Adingabeak konortea galdu zuen eta Laredoko Ospitalera eraman zuten. Buruan kolpe bat jaso zuen baina, jada, alta hartu du.
Laredoko (Kantabria) Udaltzaingoak barraka bat itxi du adingabe bat airean atera eta buruan kolpe bat jaso ondoren.
Udaltzaingoak jakinarazi duenez, "Lapikoa" izeneko barraka atzo arratsaldean itxi zuten, zauriak egin zituzten bi gazteren gurasoek salaketak jarri ondoren.
Salaketako bat buruan kolpea jaso zuen neskatoaren gurasoak jarritakoa da, gaztea barrakatik airean atera eta lurrera erori ostean. Adingabeak konortea galdu eta Laredoko Ospitalera eraman zuten. Buruan kolpe bat jaso zuen baina, jada, alta hartu du.
Horregatik, agenteek barraka ixteko gomendioa egin zion alkateari, gertatutakoa argitu arte.
Itxitako barraka plastikozko lapiko antzeko bat da, 30 lagun inguru egon daitezke barruan eta bira egiten du.