FENOMENOAK
Abiadura handiko asteroide bat Lurrera hurbilduko da igande honetan
AGENTZIAK | EITB.EUS
21:30ean egongo da gertuen, baina ez da Lurra jotzeko arriskurik izango, NASAko adituen arabera.
Asteroide baten irudia. Argazkia: NASA
2002 AJ129 asteroidea, Lurretik gertu dauden objektu erregistratuen artean abiadura handienetakoa duena, oso gertu pasatuko da otsailaren 4an, baina ez du gure planeta jotzeko arriskurik izango.
Gertuen egongo den unean, 34 kilometro segunduko abiadura izango du asteroideak, Lurretik gertu dauden objektuek normalean izaten dutena baino askoz ere altuagoa.
21:30 aldera izango da Lurretik hurbilen asteroidea, 4,2 milio kilometrora hain zuzen ere (Lurra eta Ilargiaren arteko distantzia 10 aldiz).
2002 AJ129 asteroidea 2002ko urtarrilaren 15ean bilatu zuten eta tamaina ertaina du (0,5 eta 1,2 kilometro artean).
Asteroide hau potentzialki arriskutsu gisa izendatuta dago, baina ez du, benetan, gure planetarekin talka egiteko arriskurik adituen arabera. Halaxe esan du Paul Chodas NASAko Lurretik gertu dauden objektuen ikerketarako zentroko kudeatzeaileak: "14 urte baino gehiago daramatzagu asteroide honi jarraipena egiten, eta, gure kalkuluen arabera, ezin du Lurraren kontra jo, ez orain, ez hurrengo 100 urteetan ere".