1938an Ezkabako gotorlekutik ihes egin zuten lau presoren gorpuzkiak topatu dituzte

1938an Ezkabako gotorlekutik ihes egin zuten lau presoren gorpuzkiak berreskuratzeko aukera eman du Larrasoañako (Nafarroa) bizilagun baten testigantzak. Bertako hilerriaren kanpoaldean, hobi batean aurkitu dituzte.

Nafarroako Gobernuak, Bake, Bizikidetza eta Giza Eskubideen Zuzendaritza Nagusiaren bidez, 1936ko kolpe militarraren lau biktimen gorpuzkiak berreskuratu ditu, agiri batean azaldu duenez.

Ezkabako gotorlekua kartzela politikoa izan zen Gerra Zibilean. Bertako ihesa Europako handienetariko bat izan zen. 1938ko maiatzaren 22an 795 preso inguruk atetik ihes egin zuten. Ihesaldian 211 preso hil zituzten. Guztira, 2.500 preso zeuden gotorlekuan.

Lau biktima horiek berreskuratuta, Foru Exekutiboak 72 gorpu topatu ditu dagoeneko, gorpuak lurpetik ateratzeko 17 indusketatan eta 20 bat prospekziotan.

Larrasoañako kasuan, Paulina Lizoainen testigantzari esker posible izan da lau gorpuak aurkitzea, neskatila zenean gertakarien lekuko izan baitzen.

89 urteko emakumeak bere lekukotza eman nahi izan zuen, Nafarroako Gobernuak Esteribarren beste gorpuzki batzuk topatu ondoren.

Bailara horretan, 50 bat preso fusilatu zituztela estimatzen da, horietatik hiru hobitik atera dituzte Usetxin, beste hiru Urdaitzen, bost Urtasunen eta bi Leranotzen; Larrasoañako azken lau biktimekin batera.