Migratzaileak hartzeko baliabideen banaketa orekatua eskatu du Artolazabalek

“Bidean dauden migratzaileak hartzeko orduan lankidetza eta koordinazio handiagoa” eskatu dio Beatriz Artolazabal Eusko Jaurlaritzako Enplegu eta Gizarte Politiketarako sailburuak Magdalena Valerio Migrazio ministroari. Era berean, “erkidego guztien artean baliabide banaketa orekatu eta eraginkorra” izatea aldarrikatu du sailburuak.

Artolazabalek eta Ernesto Sainz Lanchares Eusko Jaurlaritzako Familia eta Aniztasun Politiketarako zuzendariak Immigrazio Sektoreko Konferentzian parte hartu dute gaur. Espainiaren migrazio egoera eta immigrazio politikak aztertu dituzte Ministerioak eta erkidegoek arratsaldean.

Geratzeko asmorik ez eta Europara bidean Espainia zeharkatzen duten migratzaileak artatzeko lankidetza handiagoa eskatu du sailburuak.

Zentzu horretan, uda honetan heldu diren eta “bidean dauden pertsona migratzaile kopuru handia kudeatzeko”, Ministerioaren plangintza eta prozeduren inguruan galdetu dio sailburuak Valeriori. Europar Batasunarekin batera estrategiarik adostu ote den argitzeko eskatu dio Artolazabalek ministroari.

Estatuaren eta Europaren egitasmo horiek pertsona migratzaileak “zuzen artatzea” bermatu beharko luketela uste du sailburuak, baita “erkidego guztien artean baliabideen banaketa orekatu eta eraginkor bat izatea ere”.

Gainera, Euskadiko erakundeek bi motatako zerbitzua eskaintzen dutela azaldu du Artolazabalek: alde batetik, bidean dauden migratzaileen oinarrizko beharrizanak artatu, eta bestetik, epe luzera Euskadin “bizi nahi duten pertsonak hartu”.

Estrategia hori laguntzeko “lan-baimenen erregularizazio azkarrago eta malguago bat” eskatu du sailburuak, baita “immigrazio esparruko eskuduntzak eguneratzea ere”.

Azkenik, Harrera programa zabaltzeko Espainiako Gobernuaren lankidetza eskatu du sailburuak.