IAT berriak isurketak kontrolatzeko sistema ere aztertuko du

Ibilgailuen azterketa teknikoa (IAT) egiten duten estazioek E-OBD irakurketa sistema duten gailuak izan behar dituzte irailaren 10etik aurrera, hala, isurketak kontrolatzeko sistemaren funtzionamendua egiaztatu ahalko dute.

Froga berri hori 2006tik aurrera fabrikatutako ibilgailuei (Euro 5 eta Euro 6 ibilgailu arinak eta Euro VI ibilgailu astunak) egingo diete, eta gasen isurpenak kontrolatzeko egiten direnen osagarri izango da (ez ordezko). E-OBD zentralitan irakurketa akatsak sumatuz gero, ez da beharrezkoa izango isurpenen testa egitea.

Espainian IATak egiten dituzten enpresen elkarteak azaldu duenez, froga berri hori ez da isurketak kontrolatzeko sistema berri bat, eta ez ditu kutsatzaile gehiago kontrolatuko. Ibilgailuek duten sistema hori zuzen dabilela egiaztatzea da bere helburua, baita manipulatua izan ez dela konprobatzea.

Aurrerago, "etorkizun hurbil batean", elektronikoki kontrolatzen diren segurtasun aktiboko eta pasiboko sistemak ere egiaztatu ahalko ditu IATk. Hau da, egonkortasun kontrola, balaztak ez blokeatzeko sistema, airbaga, argiztapen eta seinalizazio sistema, segurtasun-uhalen tenkagailua, kilometrajea. "Oraindik, dena den, ez du datarik", argitu dute elkartetik.

Azterketa beste zentro batean egiteko aukera

IAT berria arautzen duen errege dekretua maiatzean sartu zen indarrean, baina irailaren 10etik aurrera jarri dituzte martxan berrikuntza nagusiak: isurketak kontrolatzeko sistema egiaztatzearena edota bigarren azterketa beste estazio baten egiteko aukera.

Gidariek iraungintze-data baino 30 egun lehenago egin dezakete azterketa. Horrez gain, gidariek estazio berria aukeratu ahal izango dute autoaren bigarren azterketa teknikoa egiteko, lehenengoan kontrako emaitza jaso ostean.