Dimisioa aurkeztu du Osakidetzako Larrialdietako zuzendari-kudeatzaileak

Osakidetzako Larrialdietako zuzendari-kudeatzaileak, Txema Unanuek, dimisioa aurkeztu du. EFEk aipatutako Osasun Saileko iturriek ez dute dimisioaren arrazoia argitu.

Osakidetzak larrialdiak koordinatzeko hiru zentroak Txurdinagakoan (Bilbo) bateratzeko asmoa erakutsi duenean aurkeztu du dimisioa Unanuek.

Sindikatuen iturrien arabera, Unanue urriaren 17an bildu zen Osakidetzako zuzendari Maria Jesus Mugicarekin, proiektuak aurrera jarraitzen baldin bazuen, dimisioa aurkezteko. Mugicak dimisioa onartu zuen, baina iturriek ez dakite Osakidetzak proiektuarekin aurrera jarraitzeko asmoa duen.

Bizkaiko gunean batuko lirateke gaur egun dauden larrialdiak koordinatzeko hiru zentroak. Proiektuak lanpostuak galtzea ekarriko duen eta zerbitzua kaltetuko duen beldur dira sindikatuak.

Aurreko astean, CCOO sindikatuak informazio gehiago eskatu zion Eusko Jaurlaritzari Gipuzkoa eta Arabako zentroen "itxiera posibleari" buruz. Horrek "lan guztia Bizkaiko zentrora eramatea ekarriko luke" eta 50 langileri eragingo lieke.

CCOOk esan zuenez, "zenbait iturrik modu ez ofizialean" erakutsi dute Arabako eta Gipuzkoako zentroen "jazoera mediko guztien kudeaketa" Txurdinagako zentrora eramateko asmoa. Bi zentro horiek "200.000tik gora larrialdi kudeatzen dituzte urtero".

Sindikatuarentzat, zentro horiek ixteak "deien kudeaketa gertatzen diren lurraldeetatik urruntzea" ekarriko luke, eta horrek "Larrialdiek emandako zerbitzua kaltetu lezake, lurralde bakoitzeko baliabideen kontrola zaildu lezakeelako".