Erregistro Zibila
Adingabe transexualek izena aldatu ahal izatea babestu du Konstituzionalak
Agentziak | Erredakzioa
Hala ere, eskaera "heldutasun nahikoa" duten eta "transexualitate egoera egonkor" batean dauden adingabeek soilik egin ahal izango dutela zehaztu du Auzitegiak.
Naizen adingabe transexualen familien elkarteko aurkezpena. Artxiboko argazkia: Naizen
"Heldutasun nahikoa" duten eta "transexualitate egoera egonkor" batean dauden adingabe transexualek Erregistro Zibilean genero aldaketa eskatu ahal izatea babestu du Auzitegi Konstituzionalak, 18 urte bete beharrik gabe.
Pertsonen Sexu Izena Zuzentzeko Legearen 1.1 artikulua Konstituzioaren kontrakoa dela ebatzi du Auzitegiak; izan ere, sexu erreferentziaren aldaketa gauzatzea eragozten die adingabeei eta gurasoei Erregistroan.
Hala ere, eskaera "heldutasun nahikoa" duten eta "transexualitate egoera egonkor" batean dauden adingabeek soilik egin ahal izango dutela zehaztu du Auzitegiak. Hain zuzen ere, hori izan zen Gorenak planteatu zion zalantza, nahiz eta inguruabar horietan aldaketa baimentzearen alde agertu.
Auzitegi Gorenak 2016ko martxoan planteatu zuen zalantza, Benasqueko (Huesca) ume transexual baten auzia aztertzen ari zenean. Sexua aldatu nahi zuen Erregistro Zibilean, 18 urte betetzeari itxaron beharrik gabe.
Patricken auzia desblokeatzea ahalbidetuko du Konstituzionalaren erabakiak bederen. Organo sexual femeninoekin jaio zen eta emakume gisa izendatu zuten Benasqueko Erregistro Zibilean, baina hazi zenean errealitatea bestelakoa zen.
Erregistro Zibilean aldaketa eskatu zuten 13 urteko gaztearen gurasoek, gizonezko bat bezala izendatzeko: Patrick; baina eskakizuna atzera bota zuten instantzia judizial guztiek, aipatutako legea kontuan hartuz.