Zaldibarko uraren eta airearen analisiek osasunerako arriskurik egotea baztertu dute

Zaldibarko edateko uraren eta airearen analisiek herritarren osasunerako arriskurik egotea baztertu dute. Ostegunean luizi handia izan zen zabortegiaren inguruan ura eta airea aztertu dute, eta azterketa horiek egiaztatu dute ez dagoela lur-jausiarekin lotutako inolako arriskurik.

Eusko Jaurlaritzaren Osasun Sailak astearte honetan adierazi duenez, Zaldibarko, Eibarko eta Ermuko herritarrek "segurtasun osoz" edan dezakete ura etxean, eta ez da amiantorik antzeman. Nolanahi ere, aire-kalitatearen kontrolak sendotuko dituzte, egunero bi laginketa eginez.

Osasun Publikoaren Zuzendaritza "jarraipen zehatza" ari da egiten gunean; ur-horniketaren sareetan laginak ari da hartzen aldizka, bai eta airearen kalitatea zaintzen ere. Eusko Jaurlaritzaren Ingurumen Sailarekin batera ari da egiten lan horiek.

Bilbo Bizkaia Ur Partzuergoaren sareak hornitzen du Zaldibar, eta bertan ez dute aparteko gorabeherarik detektatu uraren kalitatean. Ermua eta Eibar, aldiz, Aixolako urtegiak hornitzen ditu (urtegi hori zabortegitik gertuago dago, baina beste isurialde batean); URA Uraren Euskal Agentziak egindako probak Aixolak zabortegiak eragindako kalterik izatea baztertu du.

Horrez gain, Osasun Sailak zehaztu du egindako kontrolek eta horniketa-sarearen sarrerako gordailuan hartutako laginak ez dutela afekziorik antzeman.

Azken urteotakoak bezalako emaitzak

Airearen kalitateari dagokionez, eta laginketek frogatu dutenez, azken urteotan hiri-inguruetan lortutako konposatu organikoen profila orain erregistratutakoen oso antzekoa izan dela. Teknikariek, baina, onartu dute konposatu horien nahasteak eragozpenak sor litzakeela, usainengatik.

Analisiek ere berretsi dute negatiboa amiantoan; izan ere, ez dute substantzia horren zuntzik antzeman. Dena den, Jaurlaritzak egunero bi laginketa jasotzen jarraituko du.