Luizia
Zaldibarkoa bezalako kasuetarako funtsa sortuko dute EAEko erakundeek
Agentziak | Erredakzioa
Larrialdietarako funtsa oraindik osatu gabe egon arren, "beharrezko baliabide guztiak" jasoko ditu herri bizkaitarrak.
Zaldibarko zabortegian lanean jarraitzen dute beharginek. Argazkia: EFE
Eusko Jaurlaritzak, foru aldundiek eta Eudel udalerrien elkarteak Larrialdietarako Erakunde arteko Funtsa sortzea adostu dute, Zaldibarko (Bizkaia) zabortegia erortzearekin edo ezohiko beste egoera batzuekin sortutako krisiei erantzuteko.
Bizkaiko Foru Aldundiak 2018ko urrian proposatu zuen tresna hori abiaraztea, eta, Pedro Azpiazu Eusko Jaurlaritzako Ogasun sailburuak azaldu duenez, "ahalik eta lasterren" egingo da, Herri Dirubideen Euskal Kontseiluaren (LHEKK) bileraren amaieran hori eratzea adostu baita.
Nahiz eta funtsaren zenbatekoa, martxan jartzeko data eta hura aplikatzeko baldintzak oraindik zehazteke dauden, Azpiazuk argi utzi du Zaldibarko zabortegia erortzearen aurrean erakundeen erantzuna bermatuta dagoela, funts berri horrekin gertatzen dena gorabehera.
"Zaldibarren baliabide guztiekin jarduten ari dira dagoeneko, ezertan eskapatu gabe; etorkizunean gerta daitezkeen antzeko beste egoera batzuetarako funtsa da hau", azaldu du Eusko Jaurlaritzako Ogasun sailburuak.