Koronabuloak
Ez da egia Osakidetzak koronabirusari buruzko galdetegi espezifiko bat duenik
EiTB
Informazio oker baten arabera, Euskal Osasun Zerbitzuaren mugikorretarako aplikazioan koronabirusaren sintomei buruzko berariazko galdetegi bat dago norberak bere burua azter dezan.
Osakidetzaren sakelatarako aplikaziotik ateratako irudia.
Azken egunotan, ohikoa izan da WhatsAppeko talde askotan jasotzea Osakidetzak koronabirusari buruzko galdetegi zehatz bat prestatu duela sakelakoetako aplikazioetarako, eta horren bidez norberak bere burua azter dezakeela galdetegi erraz bati "bai edo ez" erantzunez, betiere "larrialdietarako telefono-zenbakiak ez saturatzeko helburuarekin".
Alabaina, informazio hori faltsua da; izan ere, gaur egun Euskal Osasun Zerbitzuaren aplikazioan ez dago koronabirusaren inguruko galderak egitera bideratutako berariazko atalik. Hala gezurtatu du Euskadiko Larrialdietako Boluntario Digitalen Elkarteak (VOST Euskadi) Twitterren duen profilean:
ES FALSO. @osakidetzaEJGV no tiene a día de hoy en su aplicación móvil un cuestionario integrado sobre coronavirus. #desinformacion #disinformation #StopBulos #COVID19 pic.twitter.com/IuOOAFhd4W
— VOSTeuskadi (@VOSTeuskadi) March 15, 2020
Aitzitik, egon badago COVID-19 gaitzari buruzko informazioa eta gomendioak biltzen dituen atal bat, baita Osasun Aholkua izeneko sekzio bat ere, aplikazioan zein webgunean, eta lehendik ere bazegoen autolaguntza sanitariorako gida bat ere aurki daiteke bertan. Gida horretan, Osakidetzak zehazten duenez, herritarrek gehien galdetzen duten "sintoma eta arazoen gaineko informazioa eta aholkuak" jasotzen dira.
Bestalde, Osakidetzaren webgunean koronabirusari buruzko informazio zabala aurki daiteke: hedapena geldiarazteko neurriak zein ohiko galderak daude bertan, eta elkartasun sareari buruzko xehetasunak ere bai, besteak beste.