Koronabirusa
Datozen egunetan salbuespen-egoera ezarriko den zurrumurrua gezurtatu du Ertzaintzak
Agentziak | Erredakzioa
Sare sozialen bidez zabaltzen ari den albistea benetako balitz, horrek arazoak ekarriko lituzke hornikuntzan epe laburrean. Ertzaintzak erabat gezurtatu du zurrumurru hori.
Ertzaintza eta Getxoko Udaltzaingoa Getxon, Ereagako sarbidea kontrolatzen. Argazkia: EFE
Sare sozialen bidez egunotan bolo-bolo zabaltzen ari den "zurrumurru funsgabe" baten berri izan du Ertzaintzak. Albiste horren arabera, Espainiako Gobernuak datozen egunetan salbuespen-egoera ezarriko du, eta horrek epe laburrean arazoak ekarriko ditu hornikuntzan. Dena dela, Ertzaintzak ziurtatu du albiste faltsu bat besterik ez dela.
Ohar baten bidez, Ertzaintzak gogorarazi du Pedro Sanchez presidenteak alarma-egoera luzatu baino ez duela egin nahi, eta, horretarako, asteazkenean Diputatuen Kongresuan ordezkatuta dauden alderdien babesa izan beharko du, Legeak ezartzen duen moduan.
Ildo horretatik, alarma-egoerak elikagaiak eta sendagaiak erosteko aukera bermatzen duela azpimarratu du Ertzaintzak.
Hori dela eta, iturri ofizialetatik ez datozen informazio guztiei entzungor egiteko gomendatu die Ertzaintzak herritarrei, eta sare sozialetan dabiltzan zurrumurruei kasurik ez egiteko, ezta zabaltzeko ere.