Unibertsitatera sartzeko azterketak uztailaren 6tik 8ra izango dira EAEn

Unibertsitatera Sartzeko Batxilergoaren Ebaluazioa uztailaren 6, 7 eta 8an egingo dute Araban, Bizkaian eta Gipuzkoan, eta Selektibitatearen ezohiko proba uztailaren 20, 21 eta 22an izango da. Egoerarik txarrenean ere koronabirusaren pandemiak eten dituen eskolei ekain hasieran berrekin ahalko dieten ustean ezarri du egutegi hori Eusko Jaurlaritzak.

Egutegi horri jarraituta, lehen azterketei dagozkien emaitzak uztailaren 15ean argitaratuko dituzte, eta ezohiko deialdiarenak uztailaren 29an, Eusko Jaurlaritzak ohar batean iragarri duenez.

Cristina Uriarte Hezkuntza sailburuak EHUrekin adostuta aukeratu ditu data horiek, Hezkuntza Sektorearen Batzarra telematikoki egin eta gero, besteak beste Espainiako Gobernuaren eta autonomia erkidegoetarako gobernuen ordezkariekin.

Azterketaren egiturari eta edukiei dagokienez, Hezkuntza Saila arduratuko da, Euskal Herriko Unibertsitatearekin koordinatuta, egungo probak egokitzeaz, ebaluazio irizpideak berrikusteaz edo proba mota malgutzeaz.

Bilera horretan Carlos Gimeno Nafarroako Hezkuntza kontseilariak ere hartu du parte. Nafarroan oraingoz ez dute datarik zehaztu, baina erantsi dute unibertsitatean sartzeko ohiko azterketak ekainaren 22tik aurrera izango direla; eta ezohikoak, uztailaren bigarren hamabostaldian, betiere horretarako osasun erakundeen baimena baldin badago.

Horrez gain, Foru Gobernuak jakinarazi du azterketa ereduan aldaketak egingo dituztela, "unibertsitatean sartzeko ikasle guztien aukera berdintasuna bermatze aldera".

Halaber, matrikula egiteko epea proba horietara egokituko dutela erantsi du.

Enplegu Publikorako Eskaintza

Bestalde, Eusko Jaurlaritzako Hezkuntza sailburuak azaldu du Hezkuntza Saila Enplegu Publikorako Eskaintza atzeratzeko aukera aztertzen ari dela. Ekainaren 20rako dago aurreikusita lehen azterketak egitea, eta Eusko Jaurlaritzak data hori atzera lezake, baina Derrigorrezko Bigarren Hezkuntzako eta Lanbide Heziketako irakasle teknikoei zuzendutako Enplegu Eskaintza Publikoari eusteko konpromisoa erakutsi du.