Aisialdiko begiraleek COVID-19aren inguruko formazio berezia jaso beharko dute

Asteazken honetan, ekainak 17, onartuko da 2020an egin ahal izango diren haurren eta gazteen aisialdiko jarduerei berrekitea arautuko duen Eusko Jaurlaritzaren dekretua. Osasun agintarien prebentzio eta higiene gomendioak bete beharko dira eta ager daitezkeen COVID-19 kasuak kudeatzeko prozedura bermatu beharko dute elkarte eta erakunde antolatzaileek.

"COVID-19aren inguruko prestakuntza espezifikoa eta eguneratua jasoko dute begiraleek, baita ezartzen diren neurri eta protokolo espezifikoen ingurukoa ere" zehazten du agindu horrek.

Ikastaro hori denbora libreko eskoletan bertan, udalen bidez... eta hamaika bidetatik jaso ahal izango da, baina udara begira egon daitekeen eskari handia eta urgentea ikusita,  Eusko Jaurlaritzako Gaztedia Zuzendaritzak online formazioa antolatu du begiraleentzat zein aisialdiko jardueren antolatzaileentzat.

Izen ematea begiraleei, ekintza horiek antolatzen dituzten administrazioetako teknikariei eta langile zein boluntario gisa jarduera hauetan parte hartzen dutenei zuzenduta egongo da lehen fasean, baita EAEn haur eta gaztetxoen aisialdi ekintzak antolatzen dituzten elkarteetako kideei ere.

Bigarren fase batean, izen ematea interesatu orori ireki ahal izango zaio.

Ekainaren 25ean, arratsaldez, emango da formazio hori, Euskadiko Gaztediaren Behatokiaren eskutik. Online izango da ikastaroa eta 1.000 lagunek jarraitzeko lizentzia duen aplikazio bat erabiliko da horretarako. Ikastaroaren ondoren, formazioa jaso izanaren ziurtagiria emango zaie partehartzaileei.

25eko ikastaroaz gain, hurrengo egunetan sor daitezkeen zalantzak eta galderak argitzeko zerbitzua ere jarriko da partehartzaileen eskura.