BBK enpresak bere adinekoen egoitzak berrituko ditu bakardadea ekiditeko

BBK enpresako gizarte-ekintzako zuzendariak, Nora Sarasola, eta Gizarteratzearen oarduradunak, Ixone Zubieta, adinekoen egoitzen modelo berria aurkeztu dute, ‘BBK Sasoiko Klubak’. Ekimen horrekin “Bizkaiko adineko pertsonen bakardadea murriztea” espero dute.

‘BBK Sasoiko Klubak’ bezala izendatu dituzten eremu berri horiek hiru berrikuntza nagusi izango dituzte, haien artean “egoitza bakoitzaren eskaintza zabaltzea eta hobetzea ahalbideratuko duten” teknologia berrien txertatzea.

Sarasolaren arabera “bakardadearen atzematean, laguntzean eta aurreikustean” izango du fokua ekimen horrek, eta bertako ekintzek adinekoen “isolamendu soziala” alde batera utziko dute “komunitateko parte-hartzeari esker”.

“Dinamikoa eta parte-hartzailea”

Teknologia berriak oinarri hartuta, egoitza bakoitzak ukimen-pantailak izango ditu ikasgela bakoitzean. Horri esker “erabiltzaileek eskaintzen diren jardueretan parte hartzeko aukera izango dute” bai kolektiboki, eta baita indibidualki ere. Egoitza bakoitzean “arrakala digitala deuseztatzean” egingo da lan, eta erabiltzaile guztiei laguntza emango zaie parte-hartzea bermatzeko.

Aldi berean, “ikasketa nagusi bat” egingo da puntako teknologiarekin, eta hala, “eremu guztietan aldi berean edota diferituan ikusteko aukera izango da.
Hamaika egoitzetan aldaketak aurrera eramateko, fundazioak “diziplina anitzeko taldea osatu du”, Deustuko Unibertsitateko kideekin eta hirugarren sektoreko profesionalekin.

Pandemiaren aurrean

Egoitzek distantzia neurriak bermatuko dituzte, edukiera mugatuko dute eta desinfekzio eta garbitasun lanak indartuko dituzte. Horrez gain, beste babes neurri batzuk ere hartuko dira, hala nola, sarreran desinfektatzea, gel hidroalkoholikoa izatea eta alfonbra desinfektatzaileak edukitzea.