KORONABIRUSA
Donostiako bi diskoteketako bezeroei PCR masiboak egingo dizkie Osasun Sailak
AGENTZIAK | ERREDAKZIOA
Abuztuaren 14an, 15ean eta 16an diskoteka horietan egon zirenei PCR proba egiteko dei egin zaie.
Komplot diskoteka. ETBko bideo batetik ateratako irudia.
Abuztuaren 14an, 15ean eta 16an Donostiako Komplot eta Tropical Disco diskoteketan egon ziren pertsonei COVID-19a atzemateko probak egiteko dei egin die Eusko Jaurlaritzako Osasun Sailak.
Egun horietan bi establezimenduetako batean egon direnek hitzordua eskatu behar dute proba egiteko, 943007909 telefonoan, Osasun Sailak eta Osakidetzak ohar baten bidez jakinarazi dutenez.
PCR testak astelehen honetan bertan hasiko dira egiten, 16:30ean, Donostia ospitalean, aparkalekuaren aurrean, eta bertara joaten direnek autoz eta maskararekin joan beharko dute.
Osasun Sailak "lasaitasun" mezua helarazi du, eta "horrelako neurriak prebentziozkoak baino ez" direla azpimarratu du, "transmisioa ahalik eta lasterren atzemateko eta kutsatze gehiago saihesteko".
Iturri berak herritarrei gogorarazi die COVID-19arekin bateragarriak diren sintomak izanez gero (sukarra, eztula, eztarriko mina, arnasa hartzeko zailtasunak edo usaimena galtzea) etxean bakartu eta osasun zentrora deitu behar dutela.
Sintomarik ez, baina PCR probaren emaitzen zain egonez gero, etxean isolatuta egon behar da.