Koronabirusa
300 euroko isuna musukoa ez erabiltzeagatik, eta 600ekoa kale-zurrutagatik, Nafarroan
agentziak | erredakzioa
Uztailaren erdialdetik, Foruzaingoak bakarrik 1.120 salaketa jarri ditu, 900 musukoekin lotuta, eta gainerakoak kale-zurrutagatik edo antzeko zerbaitengatik.
Gizon bat egunkaria irakurtzen musukoa jantzita. Argazkia: Efe
Nafarroako Gobernuak koronabirusari aurre egiteko osasun neurriak urratzeagatik jartzen diren isunak gaurko eta bateratu ditu lege dekretu baten bidez. Hala, 100 eurotik 600.000 eurora arteko isunak aurreikusten ditu; tartean 300 eta 600 eurokoak, musukoa ez erabiltzeagatik eta kale-zurrutagatik, hurrenez hurren.
Dekretuan hainbat arau aurreikusten dira, eta berritu egiten ditu isun batzuen zenbatekoak, osasun publikoarentzat arriskutsuak diren portaerak errepikatzen dituztenentzat adibidez.
Javier Remirez presidenteordeak prentsaurreko batean adierazi duenez, gizartearen gehiengo zabala betetzen ari da pandemiari aurre egiteko arauak, baina gutxiengo bat badago elkartasunez jokatzen ez duena, eta jarrera horien aurka kontzientziazioa eta segurtasun indarren lana uztartzen omen dituzte.
Horren harira, gogorarazi du uztailaren erdialdetik, Foruzaingoak bakarrik 1.120 salaketa jarri dituela, 900 musukoekin lotuta, eta gainerakoak kale-zurrutagatik edo antzeko zerbaitengatik.
Portaera horiek galarazteko, dekretuak arau hauste arinak aipatzen ditu, 100 eta 3.000 euro arteko isunekin; larriak, 3.001 eta 60.000 euro arteko isunekin; eta oso larriak, 60.001 eta 600.000 euro arteko zigorrekin.