Itxi

Koronabirusa

Udalerriak COVID-19aren semaforoaren arabera sailkatzen hasi da Osasun Saila

eitb.eus

Leer en Castellano

Durango eta Gipuzkoako sei udalerri gorriz koloreztatu dituzte, azken 14 egunetan izandako intzidentzia-tasa altua dela eta. Semaforoak berdez, horiz, laranjaz edo gorriz margotzen ditu udalerriak.

Hainbat pertsona Bilbon, konfinamendua indarrean zegoenean. Artxiboko argazkia: EFE

EGUNERATZEA (2020/10/16): Gipuzkoako zortzi udalerri eta Bizkaiko bi gorriz margotu dituzte, COVID-19a dela eta

COVID-19ak Euskadiko udalerrietan izandako eragina aztertzen duen koloretako semaforo bat erabili du gaur, lehen aldiz, Eusko Jaurlaritzako Osasun Sailak. Hain zuzen ere, Europar Batasunak (EB) onartutako koloreen mapa egokitu du, eta azken 14 egunetan metatutako eragin-tasaren arabera sailkatu ditu EAEko udalerriak.

Gauzak horrela, semaforo horrek kolore berde, hori, laranja edo gorriarekin sailkatzen ditu 5.000 biztanletik gorako udalerriak, azken bi asteetan hautemandako koronabirus kasu berrien arabera. Zehazki, koloreak horrela esleitzen dira:

- Berdea: Intzidentzia-tasa 100.000 biztanleko 60 kasutik beheragokoa denean.

- Horia: Intzidentzia-tasa 100.000 biztanleko 60-299 kasu artekoa denean.

- Laranja: Intzidentzia-tasa 100.000 biztanleko 300-499 kasu artekoa denean.

- Gorria: Intzidentzia-tasa 100.000 biztanleko 500 kasukoa edo hortik gorakoa denean.

Lehen egunean, Gipuzkoako sei udalerri gorriz agertu dira; beraz, kutsatzeko arriskua handia da han. Zehazki, ondorengo udalerri hauek dira: Azkoitia, Azpeitia, Beasain, Ordizia, Tolosa eta Zumarraga.

Intzidentzia-tasa zertxobait txikiagoa izan da Andoainen, Astigarragan, Eibarren, Elgoibarren, Errenterian, Lasarte-Orian, Lazkaon, Legazpin, Lezon, Oñatin, Pasaian, Urnietan, Urretxun, Villabonan eta Zumaian, guztiak laranjaz koloreztatuta.

Bestalde, Aretxabaleta, Arrasate, Bergara, Donostia, Hernani, Hondarribia, Irun, Mutriku, Oiartzun, Orio, Usurbil eta Zarautz horiz margotu dituzte.

Bizkaian, Durango da gorriz agertu den udalerri bakarra. Laranjan, berriz, Abadiño, Elorrio, Ermua, Gorliz, Gueñes, Lekeitio, Muskiz, Portugalete eta Sestao sailkatu dituzte.

Testuinguru horretan, ez da udalerri berderik egon, eta horiz honako hauek agertu dira: Abanto, Arrigorriaga, Balmaseda, Barakaldo, Basauri, Berango, Bermeo, Bilbo, Derio, Erandio, Etxebarri, Galdakao, Gernika-Lumo, Getxo, Leioa, Mungia, Ondarroa, Ortuella, Santurtzi, Sopela, Trapagaran, Zalla eta Zornotza.

Azkenik, Araban, Amurrio bakarrik agertu da berdez, intzidentzia-tasa 100.000 biztanleko 60 kasutik beherakoa izan baita (47,99). Beste udalerri batzuek, Agurainek, Laudiok eta Gasteizek, esaterako, kolore horia izan dute.

EGUNERATZEA (2020/10/16): Gipuzkoako zortzi udalerri eta Bizkaiko bi gorriz margotu dituzte, COVID-19a dela eta
Kontuan izan osasun agintariek koronabirusaren aurrean eman dituzten aholkuak. Albiste faltsuak zabaldu dira; beraz, agintariek emandakoei bakarrik egin kasu. Gaitzaren sintomarik baduzu eta EAEn bizi bazara, osasun-zentrora deitu, eta zalantzarik izatekotan, Osasun Batzordearen telefonoa duzu eskuragarri: 900 20 30 50. Nafarroan bizi bazara, berriz, Osasun Batzordearen telefonora dei dezakezu: 948 290 290. Gogoratu COVID-19a ez hedatzeko modurik eraginkorrena eskuak sarri garbitzea dela. Ahoa estaltzeko maskarak derrigorrezkoak dira EAEn eta Nafarroan. Iparraldean, "espazio publiko itxietan" da derrigorrezkoa, baita Lapurdiko herri eta hiri nagusietan ere.

Albisteak (7)