KORONABIRUSA
Covidaren eraginak handia izaten jarraitzen du EAEn, % 6,7ko tasa eta 490 kasurekin
I. G. | EITB MEDIA
Bizkaian 235 positibo berri zenbatu zituzten, aurreko egunean baino 6 gutxiago; Gipuzkoan 163, 26 gutxiago, eta Araban 82, 18 gehiago. 35 lagun ospitaleratu dituzte, eta ZIUn ez da aldaketarik izan.
PCR proba. Artxiboko argazkia: EFE
Koronabirusak Euskadin duen eraginak goranzko joera mantendu du azken 24 orduotan, 490 positibo berri erregistratu baitira urteko azken egunean. Gainera, kutsatze-tasa % 6,9ra igo da, aurreko egunotan % 6 inguruan egon ostean.
Ostegunean zebatutako kopurua aurreko egunekoa baino txikiagoa izan da, 18 gutxiago zenbatu baitira. Ostegunean 1.213 proba gutxiago egin zituzten, guztira 7.111 izan ziren, asteazkeneko 8.324 proben aurrean, Osasun Sailak emandako datuen arabera.
Egindako testetan agertutako positibo tasa % 6,9koa da, aurreko bi egunetan baino altuago, hain zuzen, % 6 eta % 6,1ean kokatu zen.
Abenduan, egun bakar batean egon da tasa atzokoa baino altuago, zehatz-mehatz, 11an, % 7,2koa izan baitzen.
Ospitaleetako egoerari dagokionez, bere horretan mantendu da ZIUn dauden pertsona kopurua: 79 (aurreko bi egunetan bezalaxe). Aldiz, ospitaleratu berriak 35era igo da, asteazkenean 28 izan ostean.
Lurraldeka, Bizkaian 235 positibo berri zenbatu zituzten, aurreko egunean baino 6 gutxiago; Gipuzkoan 163, 26 gutxiago, eta Araban 82, 18 gehiago. Era berean, 10 positibo berri izan dira bizilekua Euskaditik kanpo dituzten pertsonen artean.
Astelehenera arte ez dituzte datuak eguneratuko, ezta Euskadiko intzidentzia metatua, herriz herrikoa, eta R0 indizea ere.