HEZKUNTZA
EHUko errektore kargua hartu du Eva Ferreirak
O. A. | EITB MEDIA
Goizean Lehendakaritzan egin den kargu-hartze ekitaldian, ezagutza zientifikoaren eta ikerketarako gaitasunaren beharra nabarmendu ditu errektore berriak.
Your browser doesn’t support HTML5 video
Eva Ferreirak EHUko errektore kargua hartu du, gaur goizean, Lehendakaritzan egin den ekitaldian.
Iñigo Urkullu lehendakaria buru zela egin dute kargu-hartze ekitaldia. Eva Ferreirak Nekane Balluerka ordezkatuko du, azaroaren 26an EHUko errektorea aukeratzeko egin ziren hauteskundeetan babes zabala eskuratu ostean.
Euskal Autonomia Erkidegoko (EAE) Aldizkari Ofizialean argitaratu dituzte Balluerkaren kargu-uztea eta Ferreiraren izendapena.
EHUko errektore kargua hartu berritan egin duen lehen hitzaldian, ezagutza zientifikoaren eta ikerketarako gaitasunaren beharra nabarmendu ditu. Haren hitzetan, "ilusioz, harrotasunez eta umiltasunez" hartu du kargua. Gaineratu duenez, kargu publiko bat bere gain hartzea ez da "pribilegio bat eskuratzea", "gizarteari zerbitzua emateko" ekintza bat baizik.
Urkullu lehendakariak, bere aldetik, eskerrak eman dizkio Nekane Balluerka aurreko errektoreari, bere "bokazioagatik, konpromisoagatik eta lanagatik". Lehendakariaren esanetan, pandemia garaian Balluerkaren lantaldeak egin duen lanari esker posible izan da aurrez aurreko hezkuntza mantentzea, "garai zail hauetan ikasleentzat, familientzat eta gizartearentzat funtsezko zerbitzua dena". Halaber, animoak eman dizkio Ferreirari abiatu duen "etapa berri" honen aurrean.