koronabirusa
Ostiral honetan AstraZenecaren beste 42.300 dosi iritsiko dira EAEra
agentziak | eitb media
Carolina Darias Espainiako Osasun ministroak jakinarazi du milioi bat dosi banatuko dituela erkidegoen artean, eta Aste Santuan ere txertatzen jarraitzeak duen garrantzia azpimarratu du.
AstraZenecaren txertoa. Argazkia: Efe
Gotzone Sagardui Eusko Jaurlaritzaren Osasun sailburuak iragarri du ostiralean AstraZenecaren 42.300 dosi iritsiko direla EAEra, eta Aste Santuko jaiegun guztietan jarraituko dutela txertaketarekin.
Carolina Darias Espainiako Osasun ministroak iragarri du bihar AstraZenecaren milioi bat dosi iritsiko direla Espainiako estatura, eta astelehenean iritsitako Pfizerren eta Modernaren milioi bat dosiekin, bi milioitik gora iritsiko direla lehenengoz astebetean.
Espainiako Osasun Sistema Nazionalaren Lurralde Arteko Kontseiluaren bileraren ostean emandako prentsaurrekoan, Valladoliden, Dariasek jakinarazi du bihar iritsiko diren txertoak ostiralean banatuko dituztela autonomia erkidegoen artean.
Ministroak berretsi du oso garrantzitsua dela erkidegoek Aste Santuko egun guztietan jarraitzea txertoa ematen, eta azpimarratu du txertoen erritmoa bizkortzen ari dela.
"Geroz eta abiadura handiagoa hartzen ari gara, eta dagoeneko esan dugu txertoen iritsiera hirukoiztu edo laukoiztu egingo dela lehenengo hiruhilekoaren aldean", azaldu du Dariasek.