Nafarroako Unibertsitateak Luka Brajnovic Saria eman dio David Beriain kazetariari

Nafarroako Unibertsitateko Komunikazio Zientzien Fakultateak Luka Brajnovic Saria eman dio 1995 eta 1999 artean bertan ikasi zuen David Beriain kazetariari. Duela zenbait egun hil zituzten Nafarroako erreportaria eta Roberto Fraile kameraria Burkina Fason, erreportaje bat egiten ari zirela.

Luka Brajnovic Sariak euren ibilbide profesionalean gizarte-balioen eta pertsonen duintasunaren alde egin duten komunikatzaileen lana saritzen du. Hogei pertsona eta erakunde saritu dituzte 1997tik.

Charo Sabada dekanoak adierazi duenez, "pena handiz baina ohorea da Komunikazio Fakultatearentzat Luka Brajnovic Saria David Beriaini ematea".

Horren hitzetan, "Davidek arrasto ezabaezina utzi du gizartean aparteko ibilbide profesionalarekin, kazetaritzaren jarduera ausart eta konprometituan".

Dekanoak gaineratu duenez, "egia defendatzeko ahaleginean, kontatu behar ziren istorioak kontatzea baimendu dioten enpresa-ekimenak bultzatu izan ditu".

Era berean, azpimarratu du Beriainek "etorkizuneko kazetariekin zuen konpromisoa, eta etengabe egiaztatu ahal izan dugu hori, beti baitzuen gure ikasleentzako denbora". Sabadak nabarmendu duenez, ia mila ikasle ohik, irakaslek eta lagunek sinatu zuten Beriaini golardo hori emateko eskaera.

Uda ostean emango diote David Beriaini hilondoko Luka Brajnovic Saria. 2021/22 ikasturte akademikoaren hasieran iragarriko dute data zehatza.