900 gazte migratzaile kalteberatasun egoeran daudela ohartarazi du Arartekoak

Manuel Lezertua Arartekoak Eusko Legebiltzarrean ohartarazi duenez, EAEn bizi diren 18 eta 23 urte bitarteko 900 gazte migratzaile "kalteberatasun-egoera larrian" daude, familiarik gabe "kalean" bizi dira eta administrazio publikoek "ez dute erantzun egokirik ematen".

Lezertuak agerraldia egin du astelehen honetan Eusko Legebiltzarreko Gizarte Politika eta Gazteria Batzordean, Elkarrekin Podemos-IUk eskatuta, "Euskal Autonomia Erkidegoko familia erreferenterik gabeko gazte migratzaileak" Arartekoaren (Euskadiko herriaren defendatzailea) ikerketaren ondorioak eta gomendioak azaltzeko.

Ikerketaren arabera, EAEn 18 eta 23 urte bitarteko 900 gaztek —gehienak Marokokoak eta Saharaz hegoaldeko Afrikakoak— egoera administratibo irregularra eta erroldatze-tasa baxua dituzte.

Gehienak "kalean" daude, familiaren edo komunitatearen laguntzarik gabe. Horien erdiak, gutxi gorabehera, babesgabetasun-egoeran dauden adingabeentzako egoitza-zentro batean egon dira aurretik.

Dena den, ikasteko eta bizitza duina izateko aukera emango dien lana aurkitzeko motibazioa dute, baina arazo nagusia dokumentazio falta dela esan dute. "Pasaporterik, erroldarik eta bizitzeko administrazio-baimenik gabe ezin dute bizitza-proiekturik gauzatu", azpimarratu du Arartekoak.

Zentzu horretan, euskal gizartean integratzeko, agintari publikoek onartutako nortasuna eduki eta baimen eta agiri jakin batzuk aurkeztu behar direla gogorarazi du.

Iradokizunak euskal administrazioei

Txostenaren arabera, gazteen "emantzipaziorako oztopo nagusietako bat" atzerritarra izatea da; hori dela eta, Arartekoak Estatuko Administrazio Orokorrarekin "elkarrizketan eta koordinazioan sakontzeko" gomendioa egin du, eta lan egiteko administrazio-baimenaren transferentzia Euskadira ekartzeko eskatu dio Jaurlaritzari.

Halaber, bizileku eta lan-baimenak lortzea eta berritzea errazteko administrazio horrekiko koordinazioa sustatzea proposatu du, eta "koordinazio-ildo egonkor bat" ezartzea Gobernuaren Ordezkariordetzekin, gazte horien dokumentazio-prozesuari laguntzeko.

Besteak beste, Arartekoak Eusko Jaurlaritzari gomendatu dio gazte migratzaile horiei zuzendutako estrategia integral bat egitea euskal gazteei emantzipazio-prozesuetan laguntzeko politiken esparruan; udalen, foru-aldundien eta gizarte-erakundeen eskura dagoen zuzkidura-etxebizitzen parkea handitzea, gazte horiei bizitzeko leku duina emateko, eta gaztelania-klaseen eskaintza "zabaltzea eta malgutzea".