Osasun Publikoko Batzordeak 12 urtetik gorako nerabeak txertatzea onartu du

Autonomia-erkidegoek eta Espainiako Gobernuko Osasun Ministerioak, Osasun Publikoko Batzordean, beste hiru talde txertatzea onartu dute; hiru talde horiek 39 eta 12 urte artean daude. Batzordeak, baina, ez ditu aztertu musukoa kanpoaldean erabiltzeko beharra bertan behera uzteko eta opor-lekuetan txertoa hartzeko aukerak.

Espainiako Osasun Ministerioak jakitera eman duenez, ondorengo asteotan txertoen erabilgarritasuna handiagoa izango denez, egungo epidemiologia-egoera ikusita eta uda hastear dela kontuan hartuta, hainbat talde aldi berean txertatzeko aukera egongo da, beheranzko adin-ordenari eutsita.

Batzordeak (Ministerioko eta autonomia-erkidegoetako zuzendari nagusiak daude bertan) txertaketa-planaren hurrengo eguneratzean beste hiru talde sartzea adostu du: hain zuzen ere, 11 taldea (30-39 urte artekoak), 12 taldea (20-29 urtekoak) eta 13 taldea (12-19 urtekoak).

Horrez gain, Batzordeak nabarmendu du lehentasuna duela mendekotasun handia duten edo arrisku oso handian dauden 12 urtetik gorakoak txertatzea; maiatzaren 31n onartu zuten adin-tarte horretako nerabeei txertoa ematea.

Teknikarien iritziz, "ezinbestekoa" da lortzea oraindik txertoa hartu ez duten 40 urtetik gorako herritarrek kanpainan parte har dezatela.

Musukoak kanpoaldean erabiltzeko beharraz eta txertoa opor-lekuan jasotzeko aukeraz, erabakirik ez

Nolanahi ere, hainbat informaziok kontrakoa zioten arren, Espainiako Osasun Ministerioak eta autonomia-erkidegoek ez diote heldu musukoa kanpoaldean erabiltzeko beharra bertan behera uzteko aukerari: "Ez da gaia landu. Ez dago datarik", zehaztu diote Ministerioko iturriek Europa Pressi.

Halaber, Batzordeak ez du erabakirik hartu herritarrek txertoa opor-lekuan jasotzeko aukeraren gainean.