Itxi

Osasun larrialdiaren amaiera

Lehendakaria: "Lorpen kolektibo handia da"

EiTB Media

Leer en Castellano

Osasun sistemaren eta funtsezko zerbitzu guztien lana azpimarratu du Iñigo Urkulluk. Gainera, "euskal gizarteak bere osotasunean azaldu duen konpromisoa eta erantzukizuna", aitortu ditu.

Osasun langile bat txaloka, Donostia Ospitalearen kanpoaldean. Argazkia: EFE

Covid-19aren aurkako borrokan egoera aldaketa "lorpen kolektibo handi" bat dela uste du Iñigo Urkullu lehendakariak. Horregatik, pandemiaren kontrako borrokan profesionalen eta gizartearen konpromisoa eskertu du, horri esker "proba gogorra gainditu dugulako".

LABIren azken bilera amaitu ondoren egindako agerraldian, osasun sistemaren eta funtsezko zerbitzu guztien lana azpimarratu du, "baita ezarritako neurrien ondorio negatiboak pairatu dituzten sektore ororena ere".

Gainera, "euskal gizarteak bere osotasunean azaldu duen konpromisoa eta erantzukizuna", aitortu ditu. "Pandemia luze, gogor eta zail bati aurre egiten ari gara; baina gainditzen ari gara", aintzat hartu du. "Puntu honetara heltzeko ahalegintxoa egin duen pertsona guztiei eskerrik asko", esan du agintariak.

Bestalde, "aurreko legealdian zein honetan borroka egindako" sailburuen lana eskertu du Urkulluk. Era berean, LABIren Aholku Batzordea osatu duten pertsona guztiei (ahaldun nagusiak, Eudeleko presidentea eta hiriburuetako alkateak, Espainiako Gobernuaren ordezkaria, sailburuak, Osakidetzako zuzendari nagusia eta sailburuordeak) eskerrak eman dizkie.

Azkenik, beste erakunde kolaboratzaile batzuen inplikazioa goraipatu du lehendakariak, bereziki BCAMena. "BCAMen txostenen bidez aurreikuspen etengabeak eskura izan ditugu; Europa, Ekialde Erdiko, Asia eta Ozeanian covid-19aren kudeaketan erreferentzian diren herrialdeetako informazio zehatzarekin", adierazi du.

Albisteak (2)