Osasun larrialdiaren amaiera
Noiz kenduko dituzte tabernariek pandemia garaian ezarritako terrazak?
EUSKADI IRRATIA
Ostalariei laguntzeko asmoz eremu publikoan ezarri ziren terrazak urte amaieran kenduko dituzte Donostian, eta urtarrilaren 7an, Iruñean. Bilbon oraindik ez dute datarik zehaztu.
Terraza bat Iruñeko alde zaharrean. Artxiboko argazkia: EFE
Ostalaritzaren sektorean pandemiaren eraginez ezarri ziren ezohiko neurriak bertan behera utziko dituzten pixkanaka. Hala, terrazen kasuan, Donostian urte amaierarekin batera, ohiko kopuru eta kokapenetan izango dira; Iruñean, urtarrilaren 7an bueltatuko dira lehengora; eta Bilbon oraindik ez dute datarik jarri pandemiaren aurreko garaira itzultzeko.
Gasteizen oso bestelakoa da egoera, Udalak ez zuelako salbuespeneko neurririk hartu, ordenantzak lehen ere baimendutakoa baino ez baitu indarrean jarri.
Osasun larrialdia amaitu den heinean, ezohiko neurriekin amaitzeko garaia iritsi dela esan du Eneko Goia Donostiako alkateak. Arrazoizko epea jarri du horretarako: urte amaieran itzuliko dira terrazak ohiko kopuru eta kokapenetara.
Iruñean, urtarrilaren 7an itzuliko da egoera lehengora. Hori bai, Enrique Maya alkateak esana du aztertu egingo dutela leku zehatz batzuetan, zezen plaza inguruan kasu, terrazak behin betiko mantentzeko aukera, bizilagunei ez zaielako hainbeste enbarazu egiten.
Bilbon, berriz, oraindik ez dute datarik zehaztu. Orain arteko neurriak ostalaritza sektorearekin eta Udaleko alderdiekin adostuta eta epemuga gabe hartu zirela gogoratu du Xabier Otxandiano Ekonomiaren Garapenerako zinegotziak, eta deseskalatzea hala egin nahi dutela azpimarratu du.
Gasteizen, Udalak ez zuen ezohiko neurririk ezarri. Ostalariei eman zaizkien terraza-lizentziak ordenantzan jasota zeuden lehendik ere. Hortaz, ostalarien beraien esku dago egungo terraza kopurua eta kokapena mantentzea edo ez.