Auzitegi Konstituzionalak legearen aurkakotzat jo du bigarren alarma-egoera

Auzitegi Konstituzionalak Konstituzioaren aurkakotzat jo du pandemiari aurre egiteko Espainiako Gobernuak ezarritako bigarren alarma-egoera. Hamar epaileetatik lau ebazpen horren aurka agertu dira.

Iturri juridikoek EFEri jakinarazi diotenez, bermeen auzitegiko osoko bilkurak Voxen babes errekurtsoa onartu du, eta hori Pedro Sanchezen Gobernuaren estrategia juridikoaren aurkako hirugarren kolpea izan da pandemian, lehen alarma-egoera Konstituzioaren aurkakotzat jo eta jarduera parlamentarioa eten behar ez zutela ebatzi ostean.

Epaia Antonio Narvaez magistratuak idatzi du eta epaile kontserbadoreen babesarekin egin du aurrera. Juan Jose Gonzalez Rivas epaimahaiko presidenteak, berriz, magistratu progresistekin bat egin du eta denen artean boto partikularra aurkeztuko dutela iragarri dute.

Lehendabiziko alarma-egoera hamabost egunean behin luzatzen zuten, Kongresuan hala adostuta. Alabaina, bigarren alarma-egoera sei hilabeterako ezarri zuten hasieratik.

Ebazpenak ez du zalantza jartzen alarma-egoeraren beharra, baina hasieratik sei hilabeterako ezarri izana "gehiegizkoa" izan zela dio, epe hori zergatik jarri zen justifikatu ez zutelako.

Halaber, erabaki horrekin Kongresua ezohiko neurri horren gaineko kontrol parlamentarioa egiteko aukera gabe geldi zela eta horrek Konstituzioa urratzen duela azpimarratu du.

Horrez gain, epaian nabarmendu dute sei hilabete horietan erkidegoetako gobernuek zein neurri murriztaile ezarriko zuten jakin gabe onartu zutela Kongresuan alarma-egoeraren luzapena.

Areago, epaimahaiak uste du oinarrizko eskubideak murrizteko neurriak zirenez, Espainiako Gobernuari zegokiola murrizketa haiek ezartzea, eta ez autonomiei.

Ildo horretan, ebazpenak dio bigarren alarma-egoera sei hilabetez luzatuta, krisi egoerak kudeatzeko araudia eta bertan jasotzen diren eskumenak eta murrizketak urratu zirela.