Koronabirusa
Gabonetako ekimenetan jende pilaketak saihesteko deia egin du Osasun Ministerioak
AGENTZIAK | EITB MEDIA
Datozen asteetan omikron aldaeraren kasu gehiago agertuko direla ohartarazita, 60 urtetik gorako pertsonei eta osasun alorreko langileei txertoaren hirugarren dosia jartzeko kanpaina ahalik eta azkarren abiatzea erabakigarria izango dela berretsi du Osasun Ministerioak.
Gabonetako argiak pizteko Donostian egindako ekitaldia. Argazkia: EFE
Ekitaldi publikoetan eta ekimen sozialetan, batez ere Gabonetan, jende pilaketak ekiditeko deia egin du Espainiako Gobernuaren Osasun Ministerioak.
Halaber, Afrika hegoaldetik iristen diren herritarren gaineko kontrol neurriak zorrozteko gomendatu du, gaur jakin den arren omikron aldaeraren lehen kasua Herbehereetan detektatu zela, ez Hegoafrikan.
Bi aholku horiek eman ditu Osasun Larrialdiak Koordinatzeko Espainiako Zentroak, "omikron aldaeraren kasuak hedatzeko arriskua handia" dela ohartarazita.
Testuinguru horretan, txertoaren hirugarren dosia jartzea oso garrantzitsua dela esan du, eta ohiko neurriak betetzea ezinbestekoa dela erantsi du: segurtasun tartea mantentzea eta musukoa erabiltzea, hain justu ere.
Ildo horretan, berretsi egin du hirugarren dosia emateko kanpainan 60 urtetik gorako pertsonek eta osasun sektoreko langileek lehentasuna izango dutela.
Oraingoz, Espainian aldaera berriaren lau kasu detektatu dituzte: bi Madrilen eta bi Katalunian.