Iruzurrak
BetiONekoak zirela esanez, dei susmagarriak eta iruzur saiakerak hauteman ditu Eusko Jaurlaritzak
Eitb Media
Erabiltzaileei botoi gorria zanpatzeko gomendioa egin diete, deia BetiONetik datorren ala ez jakiteko. Erabiltzaile ez direnei, zerbitzua kontratatzeko baldintzak, bideak eta tarifak gogorarazi dizkiete.
BetiON telefono bidezko asistentziarako gailua. EITBren artxiboko irudia.
BetiON telelaguntza aurreratuko zerbitzu publikoak antzeman duenez, hainbat erabiltzailek telefono-dei susmagarriak jaso dituzte, igorlea betiON zela aditzera emanez. Zehazki, dei horietan telelaguntzako erabiltzaileak diren ala ez galdetzen zaie, edo medailatxoa duten.
Ondorioz, betiONek erabiltzaileei telefonoz bidaltzen dizkien mezuak indartu ditu egunotan, lapurreten, iruzurren eta/edo iruzurren prebentzioari buruzko aholkuak emateko. «Eskaintzen dugun mezurik argiena hau da: zalantzarik izanez gero sakatu botoi gorria, jakiteko gu garen ala ez deia egin duena», adierazi du Iñigo Mijangos betiONeko arduradunak.
Ohikoa da betiONeko langileek aldizkako deiak egiten dituztenean hainbat gai jorratzea eta aholkuak ematea erorikoak, arriskuak, autozainketa, beroaren edo hotzaren aurkako neurriak eta abar saihesteko. Aholku horien artean, lapurretak eta/edo iruzurrak nola saihestu ere gomendatzen zaie. Adibidez, iruzurraren bidezko lapurretak saihesteko, teknikari baten bisita jasotzen dutenean dagokion enpresara deitzea gomendatzen zaie, eta beharrezko egiaztapenak egiten dituzten bitartean, pertsona horiei etxean sartzen ez uztea gomendatzen dute, etxetik kanpo edukitzea, alegia, atea itxita.
Bi amarru mota, erantzunaren araberakoak
Bi amarru mota hauteman dira, telelaguntza amarru gisa erabiltzen dutenak; izan ere, telelaguntza-zerbitzua erabiltzen duten edo medailatxoa duten galdetuz hasten da elkarrizketa.
Lehenengo kasuan, erabiltzaile ez direla esaten duten haiek, eskaintza bat jasotzen dute 20 euroren truke telefono bidezko laguntza-zerbitzua kontratatzeko; honek baina ez du zerikusirik zerbitzu publikoarekin.
Horri dagokionez, betiONek gogorarazi du gaur egun euskal telelaguntza publikoa bakarrik bizi diren 75 urtetik gorako pertsonentzat, mendetasun-arriskuan dauden pertsonentzat, mendetasun aitortua duten pertsonentzat eta gizarte-isolamenduko arriskuan dauden pertsonentzat dela, eta oinarrizko gizarte-zerbitzuen, ZUZENEANen 012 telefono-zenbakiaren eta hiru lurraldeetan dituen bulegoen edo https://www.euskadi.eus/betion webgunearen bidez eska daitekeela. Zerbitzuaren hileko kostua aldatu egiten da erabiltzailearen errentaren arabera: 4 euro hilean edo doan delarik.
Atzemandako bigarren dei motari dagokionez, erabiltzaile direla diotenekin, igorleak elkarrizketa bat hasten du eta aditzera ematen du telelaguntza-zerbitzu publikotik datorrela deia (berau aipatu gabe). Elkarrizketa erabiltzailearen osasunaren ingurukoa da, eta, bertan, igorleak bisita bat egiteko hitzordua eskatzen du. Bisita hori egitean, koltxoi bat saltzen saiatzen dira.
Gaur egun, 62.500 pertsonak baino gehiagok dute betiON medailatxo gorria deritzona. Erabiltzaile gehientsuenak bakarrik bizi den 80 urtetik gorako emakumeak dira. Izan ere, lau erabiltzailetik hiru (ia %77) emakumeak dira. 80 urtetik gorako pertsonen ehunekoa antzekoa da, % 80 ingurukoa, eta erabiltzaileen batez besteko adina 84 urtekoa da.