SARRASKIA
El Salvadorreko Justiziak Ellacuriaren eta beste bost jesuiten hilketaren auzia zabaldu du berriro
AGENTZIAK | EITB MEDIA
Auzitegi Nazionalak 133 urteko espetxe zigorra ezarri zion Inocencio Montano El Salvadorko ministrorde eta koronel izandakoari, 1989an El Salvadorren bost jesuita hiltzeagatik.
Hilketa. Artxiboko irudia: EITB Media
El Salvadorreko Auzitegi Konstituzionalak Ignacio Ellacuria eta beste bost jesuiten hilketen auzia berriro irekitzea babestu du. Hala, ospe handiko figura politikoek (Alfredo Cristiani presidente ohia eta Indar Armatuetako beste goi-kargudun batzuk, kasu) epailearen aurrean eseri beharko dira.
Irailean, auzitegiko Zigor Arloko Salak baliogabetzat jo zuen epaiketa eta espedientea itxi zuen, delituak preskribatuta zeudela argudiatuz. Orain, baina, Konstituzio Arloko Salak onartu egin du hain zuzen ere prozesuaren deuseztasuna deklaratzen zuen ebazpenaren aurka aurkeztutako helegitea.
Sarraskia 1989ko azaroan gertatu zen, Erdialdeko Amerikako San Salvador Unibertsitateko campusean. Sei jesuita, horietako bost Estatu espainiarrekoak, hil zituzten, horien artean Ignacio Ellacuria, Portugaletekoa, Askapenaren Teologiako ideologoa.
Rodolfo Delgado Salvadorreko fiskal nagusiak txalotu egin du erabakia. "Hainbat urtez, nazioko zein nazioarteko ahotsek justizia eskatu zuten Jesuiten kasuan. Aurkezten dugun helegitearen aurrean, gaur Konstituzionalen Salak arrazoia eman digu. Kasua berriro irekiko da", adierazi du Twitterren.
1989tik 1992ra bitartean 75 000 hildako izan ziren gerra zibilean, eta NBEren arabera, krimenen % 80 segurtasun indarrek egin zituzten.
2020ko irailaren 11n, Espainiako Auzitegi Nazionalak 133 urteko kartzela-zigorra ezarri zion Inocente Orlando Montano koronelari, bost hilketa terrorista leporatuta.