Itxi

CORONAVIRUS

"Deltakron" aldaera aurkitu dute Zipren, delta eta omikron aldaeren konbinazioa

I. G. | EITB MEDIA

Leer en Castellano

Koronabirusaren bi aldaeren bertsio konbinatu baten 25 kutsatze kasu atzeman dituzte.

Laborategi bat. EITB Mediako bideo batetik ateratako irudia.

Zipreko agintariek jakinarazi dutenez, delta eta omikron aldaeren bertsio konbinatu baten 25 kutsatze kasu atzeman dituzte ("deltakron" deitu diote).

"Gaur egun omikron eta delta aldaeren kutsatze nahastuak daude. Bien arteko konbinazioa den aldaera bat aurkitu dugu", azaldu du Leondios Kostrikis Zipreko Unibertsitateko Biologia irakasle eta Bioteknologia eta Birologia Molekularreko Laborategiko zuzendariak.

Kostrikisek Signa TV kateari egindako adierazpenetan azaldu duenez, aldaera berriak omikron aldaeraren sinadura genetikoa eta delta aldaeraren genomak ditu.

Orain arte Kostrikisek eta bere taldeak 25 deltakron kasu atzeman dituzte, eta ohikoagoak direla covid-19agatik ospitaleratutako gaixoetan nabarmendu dute, ospitaleratu gabeko positiboetan baino.

Urtarrilaren 7an, atzemandako 25 pertsonen laginak Pasteur Institutuko GISAID nazioarteko datu-basera bidali ziren. Azken hori gripearen eta koronabirusaren aldaera berrien sekuentziazio ofiziala argitaratzeaz arduratzen da.

"Etorkizunean ikusiko dugu aldaera hori patologikoagoa edo kutsakorragoa den, edo deltari eta omikroni gailenduko zaien", adierazi du, baina, bere ustez, litekeena da omikron aldaera gainetik geratzea, kutsagarriagoa delako.

Kontuan izan osasun agintariek koronabirusaren aurrean eman dituzten aholkuak. Gaitzaren sintomarik baduzu, EAEn bizi bazara, osasun-zentrora deitu, eta zalantzarik izatekotan, Osasun Batzordearen telefonoa duzu eskuragarri: 900 20 30 50. Nafarroan bizi bazara, berriz, Osasun Batzordearen telefonora dei dezakezu: 948 290 290. Gogoratu covid-19a ez hedatzeko modurik eraginkorrena musukoa erabiltzea, espazioak aireztatzea, segurtasun-distantzia gordetzea eta eskuak sarri garbitzea dela.

Albisteak (1)