KORONABIRUSA
18 urtetik gorako guztiei errefortzu dosirako hitzordua ematen hasi da Osakidetza
EITB Media
EAEko adin nagusi guztiek dagoeneko eskatu dezakete txertoaren errefortzu dosia jasotzeko zita.
Foto: EFE
18 urtetik gorako guztiei errefortzu dosirako hitzordua ematen hasi da Osakidetza, osasun zerbitzu publikoko iturriek EiTB Mediari baieztatu diotenez.
Euskal Autonomia Erkidegoan (EAE) 40 urte baino gehiago duten herritarren % 51,6k covi-19aren kontrako dosi gehigarria jaso dute.
Azken egunetan lortu du EAEk errefortzu dosiaren langa hori (% 50) gainditzea, aurreko buletinean —ostegunekoan— ez zelako % 49ra iristen. Txertaketa pediatrikoaren ere lortu da marka bera, eta 5-11 urtekoen % 53,2k gutxienez dosi bat jaso dute. % 7 pasatxok pauta osoa du dagoeneko.
Guztira, 1.843.106 pertsonak jaso dute dosi bat, eta 1.820.980k pauta osoa dute. Ehunekotan jarrita, xede biztanleriaren % 93,2 eta % 92 dira. % 3,2k ez dute txertoa hartu kontraindikazioagatik edo uko egin diotelako.
Adin tarteka, 20-29 urtekoek dute inokulazio maila txikiena: % 83,2k du pauta osoa. Kontrara, babestutakoen ehuneko handiena 80-89 urtekoen artean dago (% 97,3).