KORONABIRUSA
Lehendakariak eta LABIren batzorde teknikoak neurri gehienak mantentzea gomendatu dute
EITB Media
Iñigo Urkullu lehendakariak ostiral arratsalderako deitu du LABIren bilera, covid-19aren aurkako egungo prebentzio-neurriak mantendu ala ez erabakitzeko. Gaur egungo murrizketak urtarrilaren 28ra arte daude indarrean.
Your browser doesn’t support HTML5 video
LABIk bilera egingo duen egunaren bezperan, gaur egun Araban, Bizkaian eta Gipuzkoan indarrean dauden neurri murriztaileak mantentzea gomendatu dute LABIren batzorde zientifiko teknikoak eta Iñigo Urkullu lehendakariak.
Iñigo Urkullu lehendakariak ostiral arratsalderako (16:30) deitu du Babes Zibileko Planaren (LABI) Aholku Batzordearen bilera, koronabirusaren zabalkundea geldiarazteko gaur egun indarrean dauden neurri murriztaileak mantendu ala ez erabakitzeko. Gaur egungo murrizketak urtarrilaren 28ra arte egongo dira indarrean.
Bilbon gaur goizean egindako ekitaldi batean lehendakariak adierazi duenez, pandemiaren bilakaera "positiboa" bada ere, egoera epidemiologikoak "zaila izaten jarraitzen du".
Lehendakariaren hitzetan, gaur egungo adierazleak abenduaren 28an LABIren Aholku Batzordea elkartu zenean baino okerragoak dira.
"Arrazoi hori dela eta, batzorde zientifiko-teknikoak neurriak indarrean mantentzea gomendatzen digu. Zuhurtzia eta zorroztasuna gomendatzen digute. Hori da nik ere aholkatzen dudana", gehitu du.
Aholku Batzordearen azken bilera abenduaren 28an egin zen. Besteak beste, ostalaritza goizaldeko ordu batean ixtea erabaki zuen, eta lokaletan edukiera % 60koa izatea, mahai bakoitzeko gehienez ere 10 laguneko muga ezarrita. Gainera, zutik kontsumitzeko debekua ezarri zuen.