EAJk eta PSEk neurri murriztaileak mantentzearen alde egin dute, kasuen beherakada sendotzeko

EAJ eta PSE gobernukideek neurri murriztaileak zabaltzearen beharra defendatu dute Radio Euskadiko "Parlamento en las Ondas" saioan, "zuhurtziagatik". Jose Antonio Suso jeltzaleak azaldu duenez, "intzidentziak behera egin badu ere", Osasun Batzorde Teknikoak uneko neurriekin jarraitzea gomendatu du. Ekain Rico sozialistaren aburuz, "bide onetik goaz", baina seigarren olatu hau kontrolatu beharra dago. Hori dela eta, murrizketak otsailaren 13ra arte mantentzea aholkatu dute. Biek defendatu dute covid ziurtagiria "beste espazio batzuetara zabaltzea".

Oposizioak, berriz, ez du gogo onez hartu Eusko Jaurlaritzak EAEko Justizia Auzitegi Nagusiari covid pasaportea zabaltzeko egindako eskaera. Haien ustez, pase sanitarioa ez da neurririk onena seigarren olatu honetako kasuak gutxitzeko.

EH Bildu, Elkarrekin Podemos-IU eta PP-Cs taldeak bestelako neurriak ezartzearen alde agertu dira, espazio itxietan "CO2a neurtzea", esate baterako.

EH Bilduko Mikel Oterok adierazi du Eusko Jaurlaritzak ezarritako neurriek ez dutela funtzionatzen, eta nabarmendu du "Lehen Arreta indartzean" ipini behar dela fokua. Oterok azpimarratu du gobernua dela osasun-sistemaren "gainezkatzearen" arduraduna, eta "kolapsatuta" dagoela.

Isa Gonzalez Elkarrekin Podemos-IU taldeko legebiltzarkidea bat etorri da diagnostiko horrekin. "Porrot" eta "desastre" gisa ikusten du Eusko Jaurlaritzaren kudeaketa, "berandu" iritsi diren eta "nahikoa" ez diren neurriekin.

PP-Cs koaliziotik, Laura Garridok Lakuaren "irizpide aldaketa" kritikatu du, eta azalpenak eskatu ditu, galdetuz zergatik den Euskadi kasuen indizerik "altuena" duena, "murrizketa handienak" izanik.

Alderdi guztiek egin diote uko Euskadin txertaketa derrigorrezko egiteari. Immunizazio-tasa % 90 gainetik dago bertan.