Nafarroak covid-19aren aurkako murrizketa guztiak kenduko ditu

Nafarroako Gobernuak covid-19aren aurka indarrean dituen neurri murriztaile guztiak bertan behera utziko ditu datorren astelehenetik, hilaren 14tik, aurrera, Santos Indurain Nafarroako Gobernuko Osasun kontseilariak asteazken honetan iragarri duenez. Besteak beste, maskara ez da derrigorrezkoa izango ikastetxeetako jolastokietan, eta ostalaritza eta gaueko aisialdia ohiko ordutegira itzuliko da.

"Beste une epidemiologiko batean gaude", esan du. Hala ere, gogorarazi du garrantzitsua dela oinarrizko arauak betetzen jarraitzea, hala nola barnealdean musukoaren erabilera edo aireztapena.

Murrizketak otsailaren 14ra arte egongo dira indarrean, astelehenera arte, hain justu. Une horretatik aurrera, foru-aginduaren baitan zeuden neurri guztiak ezabatuko dira:

- Maskara ez da derrigorrezkoa izango ikastetxeetako jolastokietan, eta burbuila taldeen bereizketa bertan behera geratuko da patioetan.

- Ez da covid ziurtagiria eskatuko inora sartzeko (solik herrialde batetik bestera mugitzeko).

- Ostalaritzak eta gaueko aisialdiak ohiko ordutegiak berreskuratuko dituzte.

- Taberna eta jatetxeetan, zutik kontsumitu ahalko da, eta mahai baten bueltan esertzeko ez da pertsona mugarik egongo. Gainera, ez da edukiera mugarik izango.

Erietxeetako presioa nabarmen arindu da, eta, ondorioz, Gobernuak ez ditu murrizketak otsailaren 14tik aurrera luzatuko. Asteazkenean kaleratutako datuen arabera, 500 positibo baino gutxiago zenbatu dituzte Nafarroan azken 24 orduotan.