Lehendakaria "itxaropentsu" agertu da neurri batzuk malgutzeko aukeraz

Iñigo Urkullu lehendakaria "itxaropentsu" agertu da koronabirusaren kontrako neurri batzuk malgutzeko aukeraz, izan ere, aitortu duenez, "egoera epidemiologikoaren bilakaera positiboa izaten ari da". "Itxaropen izpia dugu", erantsi du. 

Urkullu Jakan (Huesca) da gaur Pirinioen Lan Elkartearen bilera batean, eta batzarraren ostean, Euskadiko egoera epidemiologikoaren eta LABIren biharko bileraren inguruan (hari dagokio neurriak zehaztea) mintzatu da.

Lehendakariak azpimarratu du LABIren batzorde zientifiko-teknikoaren irizpenaren zain egon beharko direla dena delako erabakia hartzeko (goizean zen biltzekoa). Baina joerak positiboa izaten jarraitzen badu, "agian malgutu" egin ahalko dituztela neurri batzuk, "betiere osasun agintarien irizpideak jarraituz".

Osasun larrialdia ere bertan behera uzteko aukeraz, zuhurrago aritu da, ordea. "Ikusiko dugu", esan du.

Lehendakariak gogorarazi du pandemian gaudela oraindik, eta neurriez hitz egiteko, prebentzio neurrien betetzetik abiatu beharko genukeela. "Prebentzio neurriak denok beteko bagenitu, errazagoa izango litzakete neurriak hartzea", deitoratu du.