Pandemiak bi urtean utzitako datuak EAEn, grafikoetan

Orain dela bi urte, 2020ko otsailaren 28an, Milanetik (Italia) etorritako emakume gipuzkoar baten kasua identifikatu zuten. Hori izan zen erregistratutako lehenengoa Euskal Autonomia Erkidegoan.

Ordudanik, bi urtean, 664.298 kasu positibo erregistratu ditu Osakidetzak. Lehenengo olatuaren pikua 655 positibo identifikatu zen eguna izan zen, 2020ko martxoaren 26an. Alderaketa datu izugarria uzten du. Azken olatuko egunik txarrena aurtengo urtarrilaren 24a izan zen: 14.063 positibo zenbatu ziren.

Eguneko positiboen datu adierazgarriagoa da intzidentzia-metatuarena, biztanle kopuruarekin harremanetan jartzen duelako. EAEn izan den intzidentzia daturik altuena 2022ko urtarrilaren 11koa da: 7.038,6 kasu 100.000 biztanleko.

Lurraldeetako datuak begiratuta, Gipuzkoak dauka maximo historikoa: 7558,4, egun berean.

2020 ekainean 0 kasuko intzidentzia lortu zen, datu ofizialen arabera behintzat.

Bi urteetan zehar ospitaleetara begira egon gara, batez ere, zaintza intentsibo unitateetara. Beteen egon diren momentua lehenengo olatuan izan zen: 2020ko apirilaren 3an 236 pertsona izan ziren EAEko ZIUetan.

Eguneko positiboak eta intzidentzia ez ziren gerora bezain altuak, baina ospitaleak inoiz ez dira hain beteta. Azken olatuan, ordea, ez dira inoiz 140 pertsona baino gehiago egon ZIUetan, positiboetan maximoak erregistratu diren arren.

Zalantzarik gabe, hildakoena izan da pandemiak utzi digun daturik ilunena. Guztira, 6.125 pertsona hil dira covid-arekin. Gehienak 80 eta 89 urte artean zuten: adin horretako 2.405 pertsona hil dira. Baina umeak ere hil dira koronabirusarekin: 0 eta 9 urte arteko bi pertsona hil dira.

Grafikoan ikus daitekeenez, hildakoen kopurua gutxituz joan da txertaketa handituz joan den heinean.