Istripua
Gizon bat hil da auto batek harrapatuta Ibarran (Gipuzkoa)
Agentziak | EITB Media
Biktimak 54 urte zituen eta gurpildun aulkian zihoan. Berarekin zihoana arin zauritu da istripuan.
Gizon bat hil da eta beste bat arin zauritu da Ibarran (Gipuzkoa), auto batek harrapatuta. Ertzaintza istripua ikertzen ari da.
Segurtasun Sailak jakitera eman duenez, 14:30 aldera izan da harrapaketa, GI-2130 errepidean. Oraindik argitzeke dauden arrazoiak tarteko, auto batek gurpil-aulkian zihoan gizon bat eta harekin zihoan beste pertsona bat harrapatu ditu, eta lehenengoa larri zauritu da.
Bertaratu diren osasun-langileek ezin izan dute ezer egin 54 urteko gizonaren bizitza salbatzeko.
Hildakoaren laguna, berriz, arin zauritu da kolpearen ondorioz, eta tokian bertan artatu dute. Ondoren, osasun-zentro batera eraman dute. Ertzaintzak dagokion ikerketa hasi du, zorigaiztoko gertaera horren inguruabarrak zehazteko.