Foruen Plazan Gazte Eremua izango da sanferminetan

Gazte Eremua Foruen Plazara bueltatuko da aurtengo sanferminetan, uztailaren 7tik 14ra. Gunea 12 eta 17 urte arteko gazteei zuzenduta dago, eta bertan ikuspegi hezitzaileko aisiako jarduerak eskainiko ditu Iruñeko Udalak.

Gazte Eremuaren ordutegia arratsaldez izango da, 19:00etatik 22:45era, eta emanaldiak, tailerrak eta puzgarriak egongo dira. Gainera, Udalak "Gozatu burua galdu gabe" kanpaina bultzatuko du, jaiak osasuntsu eta arduraz bizitzeko norberak duen erantzukizunari buruz kontzientziatzeko.

Bocabeats Komedia bikote bilbotarrak irekiko du gunea, eta inprobisazio eta parodia musikalen showa eskainiko dute. Uztailaren 7an eta 10ean, apar-festak izango dira, eta uztailaren 11rako, berriz, tailer bat antolatu dute mozorroak eta fantasiazko makillajeak sortzeko. Beste jarduera batzuen artean daude elkarlaneko horma-irudi bat (uztailaren 9an), hennarekin tatuajeak egiteko tailer bat (uztailaren 12an) eta bubble balls tailerra (uztailaren 13an).

Halaber, uztailaren 7a eta 13a bitartean DJ eta artista ezberdinen emanaldiak egongo dira gunean. Itxiera egunean, alkoholik gabeko edarien dastatzea, uretako jokoak eta Nakama Planetek eta Ramon Mirabetek kontzertuak eskainiko dituzte.

2019, Gazte Eremuaren aurreko urtean, 2.500 gaztek parte hartu zuten. Hurrengoa da programazio osoa: