Ertzaintzak marihuana-plantazio bat aurkitu du Aretxabaletan, etxebizitza batean sute bat izan ondoren

Ertzaintzak 45 urteko gizonezko bat atxilotu du Aretxabaletako (Gipuzkoa) bere etxean sute bat piztu ondoren. Etxe barruan marihuana-plantazio bat aurkitu dute, landareak garatzeko eta hazteko elementuez eta sistemez hornituta, bai eta beste hainbat landare eta substantzia ere, ustez sorgorgarriak, beste gela batzuetan banatuta.

Segurtasun Sailak jakinarazi duenez, ostiral goizaldeko bostak inguruan aurkitu zuten plantazioa Aretxabaletako etxebizitza batean, sute bat izan baitzen bertan. Suhiltzaileak eta Ertzaintzako patruilak bertaratu ziren, eta etxebizitzan zegoen pertsona bakarra Debagoieneko Ospitalera eraman behar izan zuten kea arnastu zuelako.

Sua itzaltzeko lanetan, etxeko gela batean marihuana-plantazio bat zegoela ohartu ziren baliabide jarduleak. Ondoren, epailearen baimenarekin, etxebizitza miatu zuten, Ertzaintzako Txakurren Unitateko agenteen parte-hartzearekin.

Horrela, miaketa horretan egiaztatu ahal izan zuten logeletako batean argiztapen-, aireztapen- eta erauzketa-ekipamenduak zeudela, landareen hazkundea errazteko. Bertan, 50 marihuana-landare baino gehiago eta ehun aldaxka inguru zituzten armairu batzuk zeuden. Bi balkoietan beste 30 landare ere aurkitu zituzten, eta eta beste gela batzuetan lehortzeko fasean zegoen substantzia begetal bat, ustez marihuana, zuten poltsak eta kaxak, hainbat lur-zaku eta landareen hazkuntzarako beste produktu batzuk. Gainera, beste substantzia batzuk eta pastillak zituzten hainbat pote eta zuriketako makina bat ere konfiskatu zituzten.

Ebidentzia horiek ikusita, inplikatua atxilotu zuten, osasun-zentroan artatu ondoren. Ertzaintzak ikertzen jarraitzen du, gertatutakoa argitzeko eta sutearen arrazoiak zehazten saiatzeko. Atxilotua aske utzi dute, Bergarako epaitegira noiz deituko zain.