INFOGRAFIA: Juan Sebastian Elkanoren mundu bira

2022. honetan bost mende beteko dira Juan Sebastian Elkano euskal marinelak (Getaria,1486-1526) munduari bira egin zionekoa. Urtemuga borobila baliatuta, eitb.eus-ek bidaldi historiko horren garrantzia azaleratu nahi izan du eta infografia oparo eta zehatz bat prestatu du. Erabiltzaileak, nabigazio interaktibo eta ikusgarri baten bidez, zirkumnabigazioa antolatzeko lanak, Magallaesek zuzendutako espedizioa eta Gaztelara egindako bueltako bidaia kontsultatu ahalko du. 

90 grados enpresak egindako lanak hiru zati ditu. Lehenengoan, Magallaes-Elkano espedizioaren ingurumariak eta prestaketa lanak zehazten dira. Ekialdeko espezia preziatuak lortzeko lehiaren ondorioz, lur urrun horietara heltzeko beste ibilbide batzuk bilatzera bultzatu zituen XVI. mendean portugaldarrak eta espainiarrak. Xede horrekin 1519an abiatu zen, hain justu, Fernando Magallaes itsasgizon portugaldarrak zuzendutako espedizioa, Karlos I.aren zerbitzupean zela. Bost ontzi, zenbait euskal ontzioletan egindakoak, itsasoratu ziren. Gipuzkoako marinela ere barruan zihoan, hainbat herrikiderekin batera.  

Bigarren infografiak lehen mundu-bira haren nondik norakoak kontatzen ditu. Besteak beste, Ozeano Atlantikoan barrena egindako bidaldia, Patagoniako ur ezatsegin eta hotzetako eskasiak eta Magallaesen kontrako matxinada ezagunaren berri —Elkano ere tarteko zela— izango du erabiltzaileak. Zailtasunak zailtasun, Magallaes lurmuturra gurutzea lortu zuten itsasontziek, eta kosta ahala kosta, Filipinetako uretan murgiltzea.  

Portugalgo kapitanaren heriotza gako izango da Gaztelara egindako itzulera bidaian, Elkanok berak zuzenduko baitu buelta, erabaki ausart bezain polemikoa batekin. Azkenean, 1522ko irailaren 6 historiko hartan bururatu zuten balentria Elkanoren gizon ahituek, Sanlucar de Barrameda (Cadiz) begiztatzea lortu zutenean. 

Infografiek oso nabigazio erraza dute —scroll-arekin atzera eta aurrera eginda— eta menu bana dute bidaldiaren mugarrietatik bestera jauzi egiteko.