Matrikulazioan lehenetsiko diren irizpideak

Zabaldu da 2023-2024 ikasturterako Haur Hezkuntza, Lehen Hezkuntza eta Derrigorrezko Bigarren Hezkuntzako ikastetxeetan aurrematrikula egiteko epea. Gaur hasi eta otsailaren 24ra arte izango da aukera izena emateko, online edota aukeratutako lehen ikastetxeko idazkaritzan.

Eusko Jaurlaritzako Hezkuntza Sailak hainbat irizpide berri izango ditu ikasturte berrirako onarpen prozesuan. Bereziki, zaurgarritasuna eta aniztasuna kontuan hartuta, ikasleak modu orekatuagoan banatzearen aldeko apustua egin nahi da. Modu progresiboan egingo dute hori, haurrak 2 urterekin eskolatzen direnetik hasita.

Bestalde, ikasleak onartzeko eta eskolatzeko dekretu berriaren arabera, eragin eremuan doikuntzak egingo dira. Udalerri handietan (hiriburuetan salbu) hainbat eragin eremu izan beharrean bakarra izango da, udalerri osokoa; eragin eremu guztietan dago ikastetxe publiko bat. Ikaslearen bizilekua eskolatik gertu egotea lehenetsiko da —zazpi puntu emango dituzte—, eta familiek nahi adina eskola aukeratu ahal izango dituzte.

Diru publikoa jasotzen duten eskola guztietan ezarriko dira irizpide horiek denak. Gaur abiatuko da matrikulazio prozesua, eta ezarritako egutegiaren arabera, apirilaren 20an argitaratuko dira onartutako ikasleen behin betiko zerrendak.

Eskaerak aurkezteko garaian, batez ere, egoera sozioekonomikoari buruzko galderak dituen galdetegi bat bete beharko dute familiek, eta hor bildutako informazioarekin erabakiko da zein ikasle hartuko duten zaurgarritzat.