Zortzi pertsona hil ziren iaz EAEko hiriburuetan izandako istripuetan; horietako sei, harrapatuta

Zortzi pertsona hil ziren zirkulazio istripuetan Euskal Autonomia Erkidegoko hiriburuetan 2022an, Bilboko eta Donostiako udalek jasotako urteko txostenen eta Gasteizko Herritarren Segurtasuneko zinegotzi Marian Gutierrezek udal batzordean emandako datuen arabera.

Hildako gehienak Bilbon jazotako harrapaketetan izan ziren. Bizkaiko hiriburuko bost hildakoen artean, lau auto batek harrapatuta zendu ziren, eta beste pertsona bat, motorretik erorita.

Donostian bi pertsona hil ziren: bat harrapatuta eta bestea moto istripuan. Gasteizko hildakoa ere harrapatu egin zuten.

Guztira, hiriburuetako istripuetan 2.371 pertsona zauritu ziren; horien artean, 124 larri. Gehienak, Donostian.

Istripuen kopurua oso antzekoa da Bizkaiko eta Gipuzkoako hiriburuetan, baina oso desberdina Arabakoaren kasuan, hiru udalek emandako datuen arabera: 1500 inguru Bilbon eta Donostian eta 6000 bat Gasteizen. Arabako hiriburuan, hala ere, beste zenbateko bat ere ematen du Udalak: 980 istripu izan ziren, biktimekin.

Epe luzerako joera, ordea, positiboa da hiru hiriburuetan. Nahiz eta istripuen kopuruak gora egin 2021arekin alderatuta, pandemiaren ondorioz oraindik mugikortasun murrizketak indarrean zeudela, 2019arekin alderatuta, istripuak ia % 9 jaitsi dira Bilbon eta ia % 2 Donostian.

Gasteizen, jaitsiera % 26koa izan da ia hamarkada batean, Udalak 2014ko datuekin egindako alderaketaren arabera.

Istripu gehienek oraindik autoak izaten dituzte tartean. Patineteekin izandako istripuei dagokienez, ehunekoa handiagoa da Arabako hiriburuan.