Eguraldia
Hotz dator asteburua, izotzagatik eta elurragatik abisu horiak iragarrita
EITB Media
Larunbat goizean, giro argia espero da, baina zerua estaliz joango da, eta euria egin dezake azken orduan. Igandea grisago esnatuko da, eta elur-kota jaitsiz joango da, 1.000 metrotik ia 100 metrora azken orduan, baina prezipitazio txikiak espero dira.
Arantzazu (Oñati), gaur goizean. Gurutze Azcarateren argazkia.
Asteburuan, hotza espero da Euskal Herria osoan, eta abisu horiak izango dira larunbat honetan tenperatura baxuak eta izotz txikia direla eta; igande eguerdian, berriz, elurra 500 metrora egongo da, eta egunaren amaieran 100 metrora jaits daiteke.
Eusko Jaurlaritzako Segurtasun Sailak abisu horia aktibatu du gaur gauerditik goizeko hamarrak arte, Gipuzkoako kostaldean izotz txikia egin dezakeelako eta ertaina barnealdean eta Araba osoan.
Izan ere, Euskalmeten aurreikuspenen arabera, larunbat honetan, goiza oso hotza izango da, eta erdi-mailako hodeiak eta goi-hodeiak agertuko dira, baina giroa argia izango da.
Arratsaldean, ordea, hodei gehiago agertuko dira, eta arratsalde-gauean euri pixka bat egin dezake, batez ere ipar partean.
Aemetek ere, abisu horia ezarri du Nafarroako erdialdean eta Pirinioetan (00:00etatik 09:00etara) tenperatura baxuak espero baitira.
Iganderako, abisu horia egongo da indarrean EAEn elurragatik. Kota 1.000 metro inguruan kokatuko da egunaren hasieran, 500 metro inguruan eguerdian eta 100-200 metrora jaitsiko da gauean, eta 0-100 metro inguruan ere zuritu dezake azken orduetan.
Hala ere, prezipitazio txikiak espero dira, aurreikusitako lodiera 0-5 cm-koa baita 1.000 metrora, 0-3 eta 600 metro bitartean, eta, gehienez ere, 1 cm-koa 200 metrora.
Giroa grisa izango da, tenperaturak behera egingo du, eta iparraldeko haize biziagoa ibiliko da; ondorioz, hotzaren sentsazio termikoa areagotu egingo da.
Nafarroako Pirinioetan, abisu horia aktibatuko da berriro, gauerditik igandeko 10:00ak arte, -6 ºC-rainoko tenperatura minimoak espero baitira.
Gainera, Meteo Francek ohartarazi du Pirinio Atlantikoan elur-jausiak izateko arriskua dagoela, gutxienez, ostiralean eta larunbatean.
Gau hotza leku askotan
Iturrietako neurketa-estazioan, Agurainen (Araba), neurtu da bart tenperaturatik hotzena (-7,1 gradu), eta zerotik beherako balioak izan dira beste toki batzuetan ere, hala nola Pagoetako estazioan (-6,5 gradu), Berastegikoan (-4,1 gradu) eta Herrerakoan (-3,7 gradu).