Bilbo Udalak ikuskapen prebentiboa egingo du Burro Canaglia jatetxean

Bilboko Udalak ikuskapen prebentiboa egingo du "laster" Burro Canaglia jatetxean, hots, Madrilgo sutea piztu zen kateak Bilbon duen establezimenduan. Madrilgo lokal hartan, bi pertsona hil ziren ostiralean piztutako sute batean, tartean Getxoko erizain bat.

Dena dela, Bizkaiko hiriburuko Udaletik azaldu dutenez, establezimenduak behar bezala ditu baimen eta instalazio guztiak.

Facua elkarteak "premiazko ikuskapena" eskatu dio Bilboko Udalari, "lokaleko landare artifizialen materiala aztertu" eta "suaren aurkakoa den egiaztatzeko".

Horrela, Facuak ohar batean azaldu duenez, "Madrilen dagoen establezimenduan jazotako ezbeharraren moduko beste bat gertatzea saihestu nahi da".

Kateak jatetxe bat du Bilbon, Iparragirre kalean, eta, horregatik, elkarteak Udalari eskatu dio lokala ikuska dezala eta egiazta dezala "segurtasun neurriak betetzen dituela".

Bitartean, Polizia Zientifikoa ikertzen ari da ostiralean Madrilen erre zen jatetxearen dekorazioa osatzen zuten materialek sugarrak lokaletik hedatzea bizkortu ote zuten. Dozenaka mahaikide eta langile harrapatuta geratu ziren suhiltzaileek erreskatatu zituzten arte.

Burro Canaglia Bar & Resto italiar jatetxearen sabaiaren eta hormen zati handi bat estaltzen zuten landare artifizialek alanbrezko sare batetik eskegita zeuden, eta, sugarren ondorioz, muturreko tenperaturan erori zen lokaleko mahaien eta lurzoruaren gainean, bezeroak ihesbiderik gabe utzita, ikerketako iturriek jakitera eman dutenez.

Madrilgo 46 zenbakiko Instrukzio Epaitegiak ikerketa ireki zuen, gertakarian hildako bi biktimen gorpuak eraman ondoren: jatetxeko 2 urteko zerbitzari bat eta egun batzuk Espainiako hiriburuan igarotzen ari zen erizain getxoztar bat.

Jose Luis Martinez-Almeida Madrilgo alkateak adierazi duenez, Justizia izango da establezimenduaren dekorazioa "lizentziaren aginduetara eta Udalaren araudira egokitzen zen" egiaztatuko duena. Almeidak berretsi du lokalak 1997tik zuela lizentzia, jatetxe gisa erabiltzeko emandakoa.

Polizia Zientifikoak gaur amaitu du jatetxe barruko begi-ikuskapena, larunbatean atzeratu behar izan baitzuten, polizien lana arriskuan jartzen zuen gas toxikoen metaketa zela eta.

Madrilgo Erkidegoko Osasun Kontseilaritzak emandako azken datuen arabera, hamar zaurituetatik zortzi ospitaleratuta daude oraindik; horietako bi, larri.