Indarkeria matxista
Dani Alves behin-behineko espetxealdian mantendu du Bartzelonako Auzitegiak
Agentziak | EITB Media
Auzitegiak bigarren aldiz baztertu du futbolariaren helegitea, eta Bartzelonako 15. Instrukzio Epaitegiaren erabakia berretsi du.
Dani Alves futbolaria, artxiboko argazki batean. EITB Mediaren bideo batetik ateratako irudia
Bartzelonako Auzitegiko 3. sekzioak Dani Alves futbolariaren behin-behineko espetxealdia baieztatu du astelehen honetan, Sutton diskotekan neska bati sexu-erasoa egin izana egotzita.
Europa Pressek kontsultatutako auto batean, Auzitegiak bigarren aldiz baztertu du futbolariaren helegitea, eta Bartzelonako 15. Instrukzio Epaitegiak hartutako erabakia berretsi du; izan ere, epaileak ere birritan egin dio uko jokalariaren eskaerari, epaiketa egin arte behin-behinean aske uztea eskatu baitu.
Epaileak ostiralean heldu zion eskaerari, eta defentsak argudiatu zuen espetxetik ateraz gero ez zuela ihes egingo, seme-alabekin Bartzelonan bizi nahi duelako, eta han erroldatu dituelako. Akusazioak "fikziozko bizitza-proiektutzat" jo zuen hori.