Trena
Renfek Donostia Hendaiarekin eta Baionarekin lotzeko asmoa du 2024tik aurrera
EITB Media
Proiektua 2024an zehar zehaztea espero da, eta mugaren bi aldeetatik oso gertu dauden hirien artean mugaz gaindiko zerbitzuak garraiatzeko harreman berriak sortzea dakar.
Renfe konpainiaren trena geltoki batean. Artxiboko irudia: EITB
Renfek Donostia Hendaiarekin eta Baionarekin (Lapurdi) lotzeko asmoa du, konpainiako presidenteak, Raul Blancok, gaur aurreratu duenez.
Horrela, konpainiak zerbitzu publikoko mugaz gaindiko ibilbide berriak abiatuko ditu 2024tik aurrera Hego eta Ipar Euskal Herria lotzeko, Espainiako Gobernuak Euskadin duen Ordezkaritzak ohar batean jakinarazi duenez.
Proiektua 2024an zehar zehaztea espero da, eta mugaren bi aldeetatik oso hurbil dauden hirien artean mugaz gaindiko zerbitzuak garraiatzeko harreman berriak sortzea dakar, "mugikortasun-sare iraunkorrago bat sortuz eta Renfe Frantzian garraio-zerbitzuen emaile gisa kokatzeko beste urrats bat emanez".
"Ez dago data zehatzik aurreikusita, beti baitakigu kontu konplexuak direla", gaineratu du Blancok.
Gainera, Renferen hurrengo helburua Parisekin lotzea dela errepikatu du, 2024an Frantzian egingo diren Olinpiar Jokoekin bat eginez.
Frantziako merkatuan sartuko balitz, Renfeko presidenteak nabarmendu du "konpainiak modu naturalean bere eskarmentuaren ekarpena egin dezakeela, eta horrekin Frantziako merkatuan eta trenbide mailako bi merkatuen arteko harremanean sendotzen lagun dezakeela".