Koronabirusa
Maskara dagoeneko ez da derrigorrezkoa osasun zentroetan, adinekoen egoitzetan eta farmazietan
Agentziak | EITB Media
Aldaketa indarrean sartu da, Espainiako Estatu Aldizkari Ofizialean argitaratu eta gero. Espainiako Gobernuak, gainera, covid-19ak eragindako osasun krisiaren amaiera onartu du.
Musukoaren derrigortasunaren amaiera. Argazkia: EFE
Agur maskarari. Aurrerantzean ez dira derrigorrez jantzi beharko izango osasun zentroetan, zentro soziosanitarioetan eta farmazietan sartzeko. Hala ere, oraindik ere erabili egin beharko dira kasu batzuetan, zainketa intentsiboetako unitateetan edo pertsona kalteberak dauden eremuetan.
Atzo, Ministroen Kontseiluak hartu zuen erabakia eta gaur Espainiako Aldizkari Ofizialean argitaratu ostean sartu da indarrean. Gainera, Espainiako Gobernuak covid-19aren osasun krisiaren amaiera onartu du.
Hala ere, Espainiako Gobernuak "maskararen erabilera indartzeko beharra" azpimarratzen du hurrengo testuinguruetan: zainketa intentsiboetako unitateetan eta pertsona kalteberak dituzten unitateetan; ospitaleetako edo Lehen Arretako larrialdietan, itxarongelak barne, eta adinekoen egoitzetan.
Gainera, adinekoen eta desgaitasunen bat duten pertsonen egoitzei dagokienez, akordioak honako hau eskatzen du: "neurri gehigarriak hartzea langileengan, egoiliarrengan edo bisitariengan sintomak agertzen badira, agerraldiak saihesteko eta adinekoen ongizatea, fisikoa zein emozionala, zaintzeko".