Eskola jantokiak
Hezkuntza Sailak 40.000 euroko isuna jarri dio Serunion enpresari eskoletako menuen gorabeherengatik
Agentziak | EITB MEDIA
Sukaldaritza-enpresak hainbat salaketa jaso ditu ikastetxe batzuetarako prestatu dituen menuen kalitate eskasagatik.
Eskola bateko jantokia, artxiboko irudian.
Hezkuntza Sailak hiru espediente ireki dizkio Serunion sukaldaritza-enpresari, ikastetxe batzuetarako menuetan hautemandako "kalitate arazoak" direla-eta salaketak jaso ondoren. Horietako baten ondorioz, 40.000 euroko isuna jarri diote enpresari.
Radio Euskadin egindako elkarrizketa batean, Jokin Bildarratz Hezkuntza sailburuak esan du oraingoz ez dutela "kontraturik" deuseztatu, eta Sailak "gertatzen diren gorabehera guztien berri" jasotzen dituela erantsi du.
Horien ondorioz, hiru espediente ireki zaizkio enpresari, "ondorio ekonomikoa duten bi tartean"; horietako bat atzo amaitu eta jakinarazi zen, eta 40.000 euroko isuna jarri zaio. Kontratua bertan behera uztea ekar dezakeen hirugarren espedienteak "bere denbora behar du", bi hilabete inguru, eta aukera emango du "eskubideak babesten badu eta benetan justifikatzen bada" kontratua eteteko.
Sailburuaren arabera, "gorabeherak" antzeman dira Durana, Zigoitia eta Murgiako zentroetan. Helburua Serunionekin kontratu osoa birplanteatzea ote den galdetuta, "kezkatzen gaituzten lehenengo gauza familiak dira" eta "kalitatezko zerbitzua ematea", esan du Bildarratzek.
Hori dela eta, "hortik urruntzen den guztia kezka bat da, eta, horren harian, ahalik eta neurri gehien hartu behar ditugu hori errepika ez dadin", adierazi du.
Hala ere, horren arabera, kontratuen lege baten barruan "mugitu" behar da Eusko Jaurlaritza: "Lege bermatzailea da, eta, jakina, enpresak bere betebeharrak ditu, baina bere eskubideak ere, baita enpresako langileek ere. Hau da, hemen kontu asko hartu behar dira kontuan, baina guretzat, benetan, lehentasuna familiak eta haien seme-alabak zaintzea da".