Donostiako Parte Zaharreko bizilagunak: "Segurtasuna interes pribatuaren gainetik dago"

Joan den astelehenean Donostiako Fermin Kalbeton kaleko Zumeltzegi jatetxean izandako sutearen ostean, Parte Zaharrean Bizi auzo elkarteak salatu du "herritarren segurtasuna interes pribatuaren gainetik" dagoela.

Ohar batean, elkarteak aditzera eman du Donostiako auzo horretako eraikinek egurrezko egiturak dituztela. Ezagutzera eman dutenez, egitura horien azpian daude, besteak beste, "60 lokal, bere garaian hurbileko merkataritzakoak zirenak, tabernen jarduera osagarri bat hartzen dutenak, gehienak lizentziarik gabe, kontrolik gabe eta Udalak ikuskatu gabe".

Parte Zaharren Bizi elkarteak eskatu du ostalaritza-establezimenduetako suteen arazoa "ez likidatzeko", hiriko beste toki batzuetan sortutako gainerako suteekin parekatuta. Jakitera eman dituzten datuen arabera, Donostiako Alde Zaharra "duela ia 30 urtetik ostalaritza-establezimenduz gainezka dagoen auzoa da". Hain zuzen ere, establezimendu bat zegoen 160 biztanleko garai hartan, eta 29 biztanleko bat, gaur egun.

Testuinguru horretan, elkarteak ohartarazi du Udal Gobernuak "legezko betebeharra" duela lokal horietan bere "hirigintza-, ikuskaritza- eta kontrol-eskumenak gauzatzeko". Era berean, "herritarren eta sektoreko langileen segurtasuna bermatu" behar dela nabarmendu dute, baita "erantzun argiak eskatzen dituzten galderak egin ere, antzeko gertakarietan arrisku guztiak murrizteko zer egin behar den jakiteko".

Elkartearen arabera, "modus operandi-a da soilik salaketa bat tartean dagoenean ikuskatzea, eta ez kasu guztietan". Hori dela eta, "ikerketak tramitezkoak ez izatea eta ondorioak publikoak izatea" nahi dutela adierazi dute.

Era berean, Eneko Goia Donostiako alkateari "egia ez esatea" leporatu diote, ostalaritza-establezimenduei ikuskapenak egiten zaizkiela esaten duenean. Azkenik, elkarteak eskaera hauek egin dizkio: "publiko egitea Udalak programatuta dituen ikuskapen-protokoloak, horien balantzea eta zenbat zigor espediente ireki diren".