Etxebizitzen batez besteko tamaina mantendu edo handitu egin da

Etxebizitzen tamaina (azalera erabilgarria) mantendu edo handitu egin da Hego Euskal Herrian 2001-2021 aldian: EAEn zertxobait handitu da batez bestekoa, 82,1 m²-tik 83,7 m²-ra; Nafarroan, berriz, txikitu, 94,4 m²-tik 92,6 m²-ra. Horrez gain, 105 m²-ko azalera baino handiagoa duten etxebizitzak bikoiztu egin dira.

EITB Dataren azken azterketak utzi ditu datu horiek. 'Etxeen eta familien aldaketa' goiburupean, familien osaera eta etxebizitzen tipologiari buruzko datu-bilketa egin dute, eta gaur eman dute horien berri EITBko hedabideek.

Halaber, txosten horren arabera, Hego Euskal Herriko familien % 80 euren jabetzako etxebizitzan bizi dira, baina urteak igaro ahala, kopuru hori murrizten ari da, oso poliki bada ere. 20 urteko epean lau puntu murriztu da euren jabetzako etxean bizi diren familien ehunekoa, eta alokairuan bizi direnen kopurua, berriz, sei puntu handitu da. Adibide gisa, pare bat datu: 2021ean, familien % 13 alokairuko etxe batean bizi ziren, eta % 80, berriz, euren jabetzako batean; 20 urte lehenago, familien % 7,3 bizi ziren alokairuan, eta % 88, euren etxe batean.

Jabetzaren ratioa handiagoa da seme-alabak dituzten familien kasuetan, % 87koa baita. Pertsona bakarreko edo guraso bakarreko familien kasuetan, berriz, alokairuak gora egin du; osaera hori duten lau familiatik bat bizi da alokatutako etxe batean EAEn zein Nafarroan.